Gunnarinn malar og malar og malar...

2004-12-07T13:38:00.000Z

Skruppum suður um helgina. Silja var að láta taka af sér gifsið. Helgin fór síðan í búðarráp og einhver jólagjafainnkaup. Bára Örk og Silja fóru í pipakökuhúsagerð til mömmu og Jóns á laugardeginum. Við Ásta létum hins vegar hunda þefa af okkur ásamt öllum hinum gömlu pönkurunum í Smáranum í Kópavoginum á Fræbblunum og Stranglers. Fræbblarnir enduðu á laginu "Í nótt" það er lag með einum stórkostlegasta og innihaldsríkasta texta. Segir nákvæmlega það sem allir hinir eru að reyna að segja undir rós í sínum lögum! Stranglers voru soldið lengi í gang. Ég held að hljóðmaðurinn hafi verið í Laugardalshöllinni að mixa í byrjun. Hann kom allavega ekki inn fyrr en eftir fyrstu 4 lögin. Þeir tóku flest af lögunum sem maður kannast við og slatta af nýjustu plötunni. Það hljómaði vel þó maður þekkti það ekki neitt. Ég var samt fúll yfir að þeir skildu ekki taka "LaFolie" eða "Næsennslísí". Svona er maður orðinn gamall og vanafastur! Ég er ekki alveg að fýla þennan nýja söngvar. Hann náði Hugh vel í gömlu lögunum en það var eins og það vantaði eitthvað power í hann. Fyrir utan það að ég vil þegar ég fer að sjá Stranglers sjá það sem þeir eru. Gamla og soldið þétta poppara/pönkara? Ekki ofurhressan, með aflitað hár og fullt af fancy tattúum söngvara sem greinilega er með árskort í ræktinni og notar það út í ystu æsar, með nýrakaða bringuna söngvara sprikla eins og hann sé Billy Idol á spítti. Það er eitthvað sem passar ekki þarna saman. En þrátt fyrir allt þetta nöldur í mér voru tónleikarnir fínir. Drullufínir eins og einhver myndi segja.

2004-11-28T21:24:00.000Z

Bændur – bakbein landsins

Merkileg! Kominn í mitt framsóknarhéraðið, eins og pabbi var vanur að segja þegar við keyrðum þetta saman, og ekki búinn að sjá eina einustu rollu ennþá. Ætli Guðni viti af þessu? Ég hefði kannski átt að segja honum af þessu þarna í kaupfélaginu áðan? Eða ég held að þetta hafi verið hann að kaupa grillkol. Rigningarsuddi og hann að kaupa kol. Ætlaði maðurinn að fara að grilla í þessu veðri? Hvað skyldi vera á grillinu hjá honum? Lambakjöt? Nautakjöt? Fiskur? Nei varla. En merkilegt að sjá hvergi eina einustu kind og ég sem hélt að það ætti ekki að vera þverfótandi fyrir þeim á þjóðvegum landsins? Bændur, bakbein landsins, pabbi var líka vanur að segja það, hvar eru rolluskjáturnar ykkar? Varla inna girðingar einhverstaðar? Um leið og ég hugsaði þetta stökk ein upp á veginn. Ég negldi á bremsuna en allt kom fyrir ekki. Hún lenti á bílnum.

Og þar hafið þið það. Nú ætla ég í hvert sinn sem það verður lambakjötsuppskrift í Gestgjafanum þessa 6 mánuði sem ég fæ hann að muna eftir henni þessari!

2004-11-28T20:55:00.000Z

Drasl! Ég var eitthvað að fikta í templatinu á þessu bloggi hérna og svaraði eins og asni einhverri spurningu með því að ýta á yes. Þá var náttúrulega spurningin hvort að maður væri með það á hreinu að þegar maður veldi nýtt template að þá hyrfu allar viðbætur og aukafítusar sem maður væri kominn. Eins og teljarinn og commentakerfið. Og ég eins og auli passaði mig ekki á að taka kópíu af html kóðanum eins og hann var. Maður á ekki að gera þetta! En... Svona er þetta. Reyni kannski að kippa þessu inn við tækifæri...þegar ég nenni...eða eitthvað. Þangað til verðið þið bara að lifa með því að geta ekkert haft um blaðrið mitt að segja.

Annars fékk ég upphringingu frá einhverjum á skrifstofu framsóknarflokksins á fimmtudaginn í skólann. Málið var að ég asnaðist til þetta að taka þátt í örsagnasamkeppni súf . Já ég veit! Það voru einhverjar kvaðir á um að einhver orð eða ákveðin nöfn þyrftu að koma fram. Mig langaði bara svo í fyrstu verðlaunin! En ég fékk sem sagt fjórðu verðlaun! Sem hægt er að sjá meira um hér

Það var semsagt verið að hringja og tékka á því hvaða blað frá Fróða mér hugnaðist að fá næstu 6 mánuði. Muna að segja upp eftir 6 mánuði ef ég ætla ekki að halda áfram að fá það. Óþolandi þegar maður fær svona prufuáskriftir og svo bara heldur hún áfram og maður fær rukkun.

Ég hafði engan áhuga á Mannlífi eða Nýju lífi. Ekki Bleiku og Bláu og ekki séð og heyrt. Þannig að kynlífið á ekki eftir að batna hjá manni og maður á ekki eftir að vera inni í nýjasta slúðrinu. En það er heldur ekki neitt nýtt! :) En matargerðin á eftir að taka stakkaskiptum og verða tilraunakenndari næstu 6 mánuðuði vegna þess að það var það blað sem ég valdi. Einhverra hluta vegna las hann, þessi blessaði framsóknarmaður upp Hús og hýbíli. Hefði sennilega tekið það. En...

Ætla að henda sögunni inn hérna líka. Þannig að ef þið viljið kommenta á hana verðið þið bara að senda mér póst á gmelsted@mi.is

2004-11-18T13:30:00.000Z

Jæja er þetta ekki orðin ágæt pása. Búinn að vera eitthvað latur við að setja inn hérna. En er að hugsa um að vera duglegri við það núna. Það er nefnilega svo fallegt veður! Ég ætla ekki einu sinni að reyna að segja hvað hefur drifið á daga mína síðan síðast. Nema mér finnst ennþá að tyrkneska lagið sé best og er hundfúll yfir því að þeir hafi tapað!

Fyrir þá sem hafa áhuga rakst ég skemmtilega síðu þar sem þú getur stofnað þjóð og "leikið" þér með hana að vild. Skapað útópíu samfélag þar sem allir lifa í sátt og samlyndi (sic) eða kúgað hana að vild. Þegar þjóð er stofnuð þarf að velja forsendur sem hafa áhrif á hvernig þjóðin hefur það. Síðan þarfa að takast daglega á við ákvarðanir sem hafa áhrif á þjóðina. Kíkið hingað ef þið hafið áhuga.

Kennarinn minn kom strax auga á að þetta væri hægt að nýta í kennslu. Unglingarnir "þurftu" því að stofna sína eigin þjóð og kljást við þetta fram að áramótum í samfélagsfræði/þjóðfélagsfræði.

Hérna getið þið kíkt á þjóðina mína og hvernig mér gengur að "hugsa" um hana.

Yfir og út í bili.

Eftirskrift: Hvernig væri að fara gera eitthvað í útlitinu...set það í nefnd.

2004-05-15T14:25:00.000Z

Ég ætla nú ekki að gefa mig út fyrir að vera Júróvissíón snilling eins og hann Arnar Jónsson. Hvað þá heldur að ég geti pikkað þau lög út sem ganga vel í fólk. Ég hélt að Finnarnir og Danirnir myndu til dæmis komast áfram. Ég og Silja sem erum ein í kotinu núna ætlum að sjálfsögðu að fylgjast með. Ætlum að fá okkur kjúklíng og franskar yfir sjónvarpinu. Hneykslast yfir lélegu lögunum. Fyllast þjóðarstolti þegar Íslendingar eru á sviðinu. Og halda með "okkar" lögum. Ég ætla að halda með Tyrkjum í ár. Fyrst að Austurríkismenn sendu ekki snillinginn Alf Poiet aftur í Júró! Ég er ekki alveg viss með hverjum Silja heldur með held samt að það sé Russlana hin þjóðlega og alþjóðlega. Það er líka mjög flott. Einhvernvegin hef ég það á tilfinningunni að 16 sætið verði okkar...enn og aftur. Ætli Belgarnir taki þetta bara ekki. Það er svo lítið búið að tala um þá! :)

2004-04-26T21:53:00.000Z

Sumarið er komið! Búið að vera fínasta veður í allan dag og það verður svona í allt sumar! Og hana nú! Bára Örk fór með sumardagsgjöfina, sem kom með rútunni á föstudag að sunnan, töffarasólgleraugun sín í leikskólann í morgun. Silja hefur verið að hlusta á sína disk með KK og ég mína nýjasta disk Daniel Lanois . Daníel þessi er upptökustjóri og góðvinur U2 og ekki spillir fyrir að þeir kumpánar dúkka venjulega upp á diskum Daníels. Bono til dæmis núna. Sérdeilis góður diskur þó hann sé ekki "Lanois-legur".

Silja ákvað að vera menningarviti fjölskyldunnar í kvöld. Hún fór á sýningu Leikfélags Hólmavíkur hérna á Drangsnesi í kvöld á leikritinu Frænka Charley's . Verkefni á öðrum vígstöðvum hindruðu það að ég kæmist líka. Hefði verið gaman að kíkja. En kemur dagur eftir þennan dag. Kvöld eftir þetta kvöld og leikrit eftir þetta leikrit. Eða ég vona það allavega!

2004-04-22T22:50:00.000Z

Gleðilegt sumar og takk fyrir veturinn!

Mamma og Jón voru í heimsókn. Þau komi seint í gærkvöldi eftir vinnu og með þeim 2/3 af fótboltaliði Bjargar systur og Heimis, þeir Orri og Arnar Már. Þau voru hér í dag og héldu síðan yfir á bæinn Barma rétt fyrir utan Reykhóla, sem er lítill sætur torfbær sem þau eiga en er alveg heill djöfuldómur að tyrfa eins og ég og nokkrir aðrir fengu að kynnast síðasta sumar! Þau komu færandi hendi með sumargjafir handa öllu liðinu og hamborgarahrygg. Sem þau höfðu ekki komist yfir að borða á páskunum! Þannig að við slógum bara upp veislu í tilefni sumars hér í hádeginu og buðum tengdó í hádegismat. Síðan var haldið var haldið, eftir kaffisopa, hrísköku og spjall (sem sagt seinnipartinn! :) til Auju leikskólakennara og Jóns á Bæ I og kíkt á nokkur lömb sem mórauður lambhrútur sem gleymdist úti í eyju með fénu þeirra á sök á. Sú för vakti mikla lukku og mamma og Jón fengu síðan kynnisferð um skólann á meðan krakkarnir fóru í fótbolta á ganginum (í skólanum)...hmmmmm! Síðan héldu þau yfir á Barma. En ætli maður sé ekki tilbúinn að takast á við sumarið...svona fyrst það er að koma helgi! :)

2004-04-12T14:20:00.000Z

Páskafríið er eiginlega farið í burtu og allt í leti og ómennsku! Ja, næstum því, en það er búið að vera gott að geta líka leift sér að dandalast og ekki gera neitt...þó maður þyrfti að vera að gera eitthvað! Það kemur niður á manni seinna. Á morgun á ég til dæmis að vera búinn að velja grein fyrir samnemendur í leshóp í upplýsingatækni. Greinar eftir C.J. Bonk aðalfyrirlesari á Ut2004 eru meðal þess sem við getum valið. Hann hefur þekkst boð um að taka þátt í spjalli við okkur um okkar meiningar um greinar sínar. Áhugavert...ég vona bara að einhver af þeim sem eiga að velja greinar velji hans grein! :)

Fór á föstudaginn langa með Ástu í Langholtskirkju og hlýddum á Sálumessuna(Requiem) eftir Mozart. Kór Langholtskirkju var frábær! Kom mér næstum á óvart, ef hægt er að segja það um þann góða kór. Kammersveitin hefði mátt vera betri, ég heyrði nokkrum sinnum pínlega feila hjá þeim. Og einsöngvararnir góðir (nema einn). En þetta voru smáatriði og í heildina voru þetta frábærir tónleikar og mjög í anda dagsins. Frábær byrjun á páskahelginni. Laugadagurinn leið í meiri leti og ómennsku. Við Bára skruppum í sund og svona.

Páskadagur. Bára vaknaði fyrir allar aldir og náði í Seríós, Kornfleks og mjólk á morgunverðarborðið og súkkulaðikanínuna frá afa Eyjólfi og og Heidi ömmu í Austurríki. Hún vissi nefnilega að hún ætti að leita að páskaegginu. Ég veit hvar það er, tilkynnti hún, í ísskáp. Þar sem það reyndar var en páskaeggið þetta íslenska og með dýra namminu sem keypt hafði verið handa henni hafði verði falið í dúkkuvagninum hennar. Áður en hún var byrjuð að leita þá fann hún það "óvart"! Frábær svipur á henni þegar hún dró eggið upp úr vagninum þar sem dúkkurnar Rósa eða Bjössi eru vanar að vera! Ennþá betri og nautnafyllri svipur þegar hún hámaði súkkulaðið í sig.

Ásta fékk líka páskaegg en þurfti að hafa ögn meira fyrir því að finna sitt. Vegna þess að elskulegur eiginmaður hennar og undirritaður hafði búið til níu vísbendingar í ferskeytluformi og ratleik fyrir hana sem sendi hana um allt hún og út fyrir það að leita að páskaegginu sínu! Hún fann það fyrir rest og það eina sem hún sagði um leið og hún plokkaði málsháttinn út og sendi elskulegum eiginmanni sínum augnaráð og glotti var...þú getur farið að hlakka til afmælisins þíns! Þannig að ef þið sjáið lítinn sköllóttan mann með hökutopp og gleraugu vera á hlaupum og hugsanlega þurfa að gera sig að fífli annað hvort norður á ströndum eða í miðbæ Reykjavíkur þann 25. júní næstkomandi. Þá vitið þið að það er undirritaður að taka út borgun fyrir eitt lítið "djók" í sambandi við lítið, sætt páskaegg númer 3 frá Nóa Síríus!

Silja fór til pabba síns yfir páskana, hjólaði með sitt hafurtask til hans og eitt páskaegg frá okkur. Kanínan hennar frá Austurríki varð eftir, heyrðum í henni og hún fékk 3 páskaegg. það þýðir að það verður mikið súkkulaðiát hjá okkur í vikunni!

Jæja, yfir og út. Ég verð að fara að klára restina af páskaegginu eða restina af lærinu frá í gær! Eða restina af Sacher-tertunni sem við Bára bökuðum á Laugardaginn! Fullt af afgöngum! Æ, æ, æ aumingja við! By the way...sacherinn er bestur svona 2-3 dögum eftir að hann er bakaður með fullt af rjóma og kaffi. Ég er farinn!...Gleðilega páska!

2004-04-05T23:40:00.000Z

Skrapp upp í Kennó í dag. Var að framlengja lán Ástu á bók Sally Gilmon "E-moderating" sem ég er búinn að vera að kíkja á núna yfir helgina. Mjög skemmtileg og áhugaverð og fjallar um mikið áhugamál...fjarnám og kennslu á netinu. Ég mæli með henni. Síðan á leiðinni út þá labbaði ég framhjá bóksölunni og sá þar rekka með bókum 200 kall stykkið. Ef það er eitthvað sem ég stennst ekki þá er það bækur og hvað þá ef þær eru ódýrar. Nú í þessu "afgangs-rusli" og "úrelltu" bókum þeirra bóksölumanna fann ég 3 sem ég keypti. Eina eftir Jón nokkurn Jónsson sem heitir "Hafrannsóknir við Ísland 1.bindi". Eina eftir Graham Vulliamy og Edward Lee sem heitir "Popular Music: A teachers guide" og eina eftir Bjarna M. Gíslason sem heitir "Handritamálið" (Getið um hvað hún er !) Það fyndna er að hún er gefin út í tilefni sötugsafmæli Bjarna sem var 4. apríl á því herrans ári 1978. Sem er fyrir 26 árum, næstum því upp á dag! Þannig að ég varð að kaupa hana...og hinar tvær líka! :)

2004-04-02T11:08:00.000Z

Í gær var fyrsti apríl! Ég náði að láta Ástu hlaupa og það í gegnum síma! Stóðst áhlaup Silju og annara að láta mig hlaupa í gönur. Og þó þær náðu að láta mig taka við kassa sem í var bara steinn sem búið var að skrifa á APRÍL gabb. Þetta tók svo á að ég gleymdi alveg að setja það inn í gær. Eins og það hefði nú verið flott að vera með færslu 1.apríl! Svona er þetta...það kemur ekkert inn hjá manni í soldin tíma og svo bara gleymir maður að setja inn þegar maður ætlar að setja inn! Dóh! En það er ekkert aprílgabb að við erum á leiðinni suður í dag og ætlum að eyða páskunum sunnan.

2004-03-26T10:49:00.000Z

Lára Stefánsdóttir kom hingað og hélt fyrirlestur um fjarnám og möguleika í því í tengslum við símenntunarsetrið sem ég ætla að setja upp hérna á Drangsnesi. Hún setti smá pistil um það hér Kynningin tókst rosalega vel. Það voru 11 manns sem mættu. Ég er mjög ánægður með það. Það eru nú bara 10% af þeim sem eru í hreppnum. Geri aðrir betur. Þeir sem mættu á fundinn voru ánægðir og Lára líka. Þannig að allt í allt var þetta hin ánægjulegasta kvöldstund. Ég er allavega í skýjunum allavega! Það eina sem skyggir á gleðina er að Liverpool tapaði í gær! Hrmmpf. Nú er bara að fara að sækja um styrki svo maður getir startað þessu dæmi...þá erum við í góðum málum, trallalalalala :) Við ætlum að skjótast suður norðanfólkið og hitta Ástu. Nú og síðan er bara vika í páskafrí!!!

2004-03-17T22:48:00.000Z

Eftirfarandi hugleiðing tengist sunnudeginum síðasta sunnudegi. Við Ásta vöknuðum fyrir allar aldir, barnslaus og allslaus og hugsuðum með okkur af því að það var svo gott veður að fara í göngutúr. Eftir miklar vangaveltur þá ákváðum við að fara vestur í bæ.

Daginn áður hafði Ásta verið að benda mér á að eitthvað hefði fílapenslum á litla nefinu mínu verið að fjölga. Ég tók eitthvað illa í það og sagði eitthvað á þá leið að ég hefði verið eitthvað með sprittið að vinna á þeim. Nú það var sprittlyktin af þér og ég hélt að þú hefðir bara verið að staupa þig!

Hvernig tengist þetta göngutúrnum á sunnudeginum? Jú vegna þess að við enduðum ekki á því að fara í neinn göngutúr heldur kíktum við á eytt eyðibýli í Reykjavík. Eyðibýli eru reyndar eitt af mörgum sameiginlegum áhugmálum okkar Ástu. Við fórum í gömlu hraðfrystihúsið (við hliðina á Ellingsen). Það er eiginlega orðið eitt af hústökuhúsunum í Reykjavík. Hvað ætli þau séu mörg? Við hittum “húsvörðinn” á leiðinni inn. Vorum ekki alveg viss hvort það væru einhverjir aðrir inni og hvort við værum að “ráðast inn á” einhverja. En hann sagði að hann væri eiginlega “fluttur út”. Væri bara að ná í smávegis dót og það væri í lagi að hver sem er kíkti. Þetta væri opið hús og allir velkomnir. Síðan lóðsaði hann okkur af stað og sagði hvar væri best að komast upp á hinar hæðirnar. Við völsuðum sem sagt þarna um og fundum margt áhugvert. Heilmargir graffarar virðast hafa tekið ástfóstri við húsið ásamt þeim sem eru “tímabundið húsnæðislausir” eins og “húsvörðurinn” orðaði það við okkur. Ásta tók fullt af myndum af þeim. Það er hægt að kíkja á þær allar hérna.

Það sem ég fór að spá í svona eftir á, eftir að hafa upplifað nöturleikan sem maður finnur í yfirgefnu húsi sem er í raun ekki yfirgefið. Það er einhvernvegin mannlegur nöturleiki og harmleikur út um allt þarna. Hvar til dæmis varð um þann sem ég fann viðurkenningarskjal stílað á. Viðurkenningarskjal frá sumarbúðum Vals – Sumarbúðum í borg. Hann gat haldið boltanum uppi 15 sinnum. Rekið hann á milli keila 250 metra. Skotið honum áfram tæplega 39 metra. Er hann einn af þeim sem eru þarna? Er hann sonur einhvers sem er þarna búsettur? Og maður getur ekki annað en prísað sig sælan að vera þar sem maður er, en ekki í hraðfrystihúsinu. Maður veltir því fyrir sér hvað oft getur verið mjótt á munum hvorum megin maður lendir.

Reyndar fór ég ekki að hugsa um þetta fyrr en á leiðinn norður þarna á sunnudagskvöldinu. Áður hafði maður verið samfélagslega meðvitaður og verið að velta fyrir sér og í raun og veru hneykslast á því af hverju “borgin” tekur rafmagn og hita af húsi sem ekki er verið að gera neitt með. Það stendur hálfrifið og bíður framkvæmda þar sem byggja á nýjar íbúðir fyrir “listamenn” og “svoleiðisþenkjandi fólk” svo enn taki ég mér orð “húsvarðarins” mér í munn. En það er vitað að þetta fólk er þarna af hverju er betra að það sé þarna á hita og rafmagns? Er einhverjum akkur í því. Er það kannski samfélagsvænna að það sé þarna við svona um það bil mannsæmandi aðstæður? En svo getur maður líka svo sem séð hinn flötinn. En samt...!

Reyndar var veðrið svo gott og við ekki búin að fá nóg af göngutúrum og útiveru. Við náðum því í Báru Örk til mömmu og Jóns þar sem hún hafði gist um nóttina. Fengum hádegissnarl hjá henni og fórum síðan suður með sjó og beygðum út af Vatnsleysuafleggjarann. Við Óttarstaði (vinsæll staður til að kafa á, ég sá Steinbít í fyrsta skipti þar) er ágæt fjara til að labba í og þar vissum við líka af eyðibýli! Stórt og reysulegt hús sem einhver lét byggja fyrir svona 10 árum. En einhverra hluta vegna varð ekkert meira úr því en raun ber vitni. Þetta er stórt og reysulegt hús með steyptum “garði” og næstum eins og sundlaug og heitapott í kjallaranum. Allavega er eins og gert sé ráð fyrir sturtum og búningsaðstöðu. Maður veltir því fyrir sér. Var það einhver rokelskandi sjávarunnandi með fullt af peningum sem átti þetta hús. En átti greinilega ekki alveg nóg af peningum til að klára þetta. Eða lenti hann í einhverjum “ógöngum” og býr núna í hraðfrysthúsinu á Ægissíðu, ásamt einhverjum öðrum? Maður hlítur að velta því fyrir sér. Þetta er allavega búið að detta reglulega í kollin á mér síðan á sunnudaginn.

Jæja, yfir og út. Ætla að fara snúa mér að einhverju öðru.

2004-03-15T12:47:00.000Z

Fékk í morgun símtal frá Láru Stefánsdóttur og hún ætlar að koma og tala um fjarnám og möguleika tengda því á kynningarfundi sem verður um fyrirhugað námsver hér á Drangsnesi. Eða ætti ég kannski að segja símenntasetur eða kannski fræðslunet? Það er mukket smukket að hún skuli vera búin að taka það að sér.

Fór í bíó um helgina með Ástu, við fórum að sjá myndina Whale rider. Hún er alveg mergjaðslega góð og kemur á óvart í raun og veru. Alltaf gaman að fara á góðar myndir. Annars var það planið að fara eitthvað út að dansa en svona er maður orðinn gamall að það er farið í bíó í staðinn! Svo spilaði nú inn í að það var lítið um möguleika á einhverju góðu þegar mann langar út að dansa. Hvar eruð þið Rússíbanar og Spaðar þegar maður þarf á ykkur að halda?!

2004-03-12T13:28:00.000Z

Nú er að hefjast þemavika hérna í skólanum í næstu viku. Þar verður allt á fullu og hún endar með árshátíð nemenda á föstudeginum. Silja er á æfingu akkúrat núna og Bára að leggja sig. Síðan erum við að hugsa um að halda suður á bóginn þegar þær eru búnar að því á ekki "númeró trois". Síðan er það bara að hafa gaman af þemavikunni í næstu viku.

2004-03-06T12:56:00.000Z

Jæja, já...humm...eitthvað hefur nú fátt verið að gerast hjá manni upp á síðkastið ef eitthvað er að marka þetta raus hérna hjá manni. Sem hefur nú verið eitthvað lítið af upp á síðkastið. Það er þessi sígilda afsökun með að það sé svo mikið að gera hjá manni og allt það. En það er búið að vera mikið að gera hjá mér!!! Núna staddur á UT að reyna að fræðast um eittahvað...nýtt. Er maður ekki alltaf að því. En ég er líka að kynna framhaldsnámið í Kennó. Líklega sem einn af þessum ofurnemendum sem þar eru :) Verð því að fara í bili...en eins og Arnols sagði um daginn...I'll be back!

2004-02-11T22:53:00.000Z

Hvað gerir maður ekki fyrir konuna sína? Fátt! Eða er það ekki?

2004-02-09T10:37:00.000Z

Komst að því að ég hef séð 7% af heiminu. Veit ekki alveg hvort það er dapurt eða vel að verki staðið. Þetta sýnir manni bara að það eru svo mörg lönd sem mann langar að koma til og skoða. Kannski að maður fari bara að safna klinki og reyna að komast eitthvað út? Hér er allavega kort af því sem ég hef ferðast

create your own visited country map

Annars er útlit að við verðum að skreppa til Írlands. Því að Ásta (eða einhver uppþvottadraugur) henti tveimur af morgunverðarskálunum niður á gólf og þær brotnuðu. Þannig að við verðum að endurtaka leikinn frá brúðkaupsferðinni og fara til Írlands og kaupa okkur morgunverðarskálar :) Svona er lífið!

Bræðurnir Jón og Arnar fjalla báðir um spurningakeppnina í gærkvöldi. Fyndið saman heita þeir eins og tugþrautakappinn :)

2004-02-09T00:18:00.000Z

Lið grunnskólans tapaði viðureign sinni í kvöld. Ég var einum einum fjórða (jafnvel minna ég held samt að augað greini ekki meiri hraða) úr sekúndu að ýta á bjölluna og svara spurningu um Al Gore sem hefði tryggt okkur jafntefli á móti Hólmadrangi (sem voru í úrslitunum víst í fyrra). En þetta var bara gaman, og skemmtilegt að taka þátt. Ég var samt alltaf að bíða eftir Liverpool spurningum sem ég hefði getað rúllað upp. Kannski að þær verði næsta ár þegar maður tekur þátt...hver veit? Vissi öll svörin í keppnunum fjórum í kvöld sem komu í kvöld um titillög úr sjónvarpsþáttum og enska boltanum (líka þetta með Wimbeldon...hefði fengið 3 stig fyrir þá spurningu...af hverju kom hún ekki í okkar keppni). Mig grunar að um sé að kenna klíkuskap! Ásta og Unnur komust suður í kvöld. Kannski að maður fari suður næstu helgi. Afi Gunnar (og næstum alnafni) verður 85 næstu helgi. Verður maður ekki að gera allt sem í sínu valdi stendur til þess að mæta og samgleðjast með honum? Ég held það. Það er allavega planið en byr verður að ráða eins og þegar kóngurinn vildi róa.

2004-02-08T12:20:00.000Z

Þær töfðust! Þurftu að gista á Hrófbergi. Væsti svo sem ekki um þær þar. Ásta var nú einu sinni í sveit þar. Þær komu síðan í gærmorgun (laugardag) og þá er þorrablótinu frestað! Vegna veðurs! Það er búið að vera bongóblíða (svona eins og getur verið á veturnar) logn og fallegt veður og glampandi sól. Svona jólakortaveður næstum því. Ég veit ekki með færðina inn á Hólmavík en við hljótum að geta druslast þangað í kvöld til að taka þátt í spurningakeppninni. Þetta verður heilmikið ævintýri fyrir Unni vinkonu hennar Silju að muna og segja frá. Hún og Silja eru búnar að prófa að lenda í aftakaveðri á Ströndum og ófærð. Hoppandi hífandi roki og skafrenningi. Búnar að prófa að gista á bæ einhverstaðar út í sveit. Nú sannaði það sig heldur betur að það borgar sig að strandir og sveitir landsins eru byggðar! Þær eru búnar að upplifa vetrarblíðu á Ströndum og Unnur er búin að prófa heitu pottana á Drangsnesi. Bára er búin að vera eins og límd á mömmu sinni síðan hún kom. En hún og Unnur fara heim í Reykjavíkina seinna í dag...eða kvöld.

2004-02-06T14:57:00.000Z

Ásta og Silja eru á leiðinni norður. Koma eftir svona hálftíma nema að bylurinn sem er núna tefji þeim mun meira fyrir þeim. Þorrablót á morgun og stelpurnar ætla að passa Báru. Síðan spurningakeppni á sunnudagskvöldið. Ætli Silja verði ekki aftur að passa þá? Ég hlakka allavega til helgarinnar. Það verður kominn mánudagur áður en maður veit af og maður þarf að fara að undirbúa sig fyrir kennslu.

2004-02-03T23:24:00.000Z

Búið að draga í spurningakeppninni miklu. Við lenntum á móti liði Hólmadrangs sem komust í undanúrslit í fyrra. Við látum það ekki á okkur fá heldur mætum með bros á vör og gerum okkar besta. Svona eins og handboltalandsliðið. Við mætum þeim þann 8.febrúar. þann 7.febrúar verður þorrablót hér á Drangsnesi. Þannig að ég veit ekki alveg með ástandið á keppendum. En eins og ég sagði við mætum með bros á vör og gerum okkar besta.

2004-02-01T00:13:00.000Z

Langt síðan ég bloggaði síðast. Og margt að frétta. Sumt af því fer hingað annað ekki ;)

Búinn að skrá lið grunnskólans í spurningakeppnina miklu Nú er bara að sjá hvernig gengur. Allavega tvö lið sem ég veit um héðan frá Drangsnesi í þessari merku spurningarkeppni...við og fiskvinnslan Drangur.

Silja fór suður á föstudaginn, fékk vikufrí vegna góðrar hegðunar eða svona næstum því. Af því að hún var búin að vinna verkefnin í skólanum upp fyrirfram og þetta var hennar umbun, að fá að hitta vinkonurnar og félagana í gamla bekknum sínum. Segiði svo að það borgi sig ekki að læra heima.

Merkilegt hvað þessir litlu hlutir skipta mann miklu máli. Um daginn vorum við Bára Örk að púsla og upp úr þurru knúsar hún mig og segir "elsa þig" sem ég túlkaði sem "elska þig" veit ekki hvaðan hún hefur þetta? en þetta kom við einhverja taug í pabbahjartanu. Svona eins og þegar hún segir eftir að hún hefur gert eitthvað sem hún veit að er ekki rétt eða hún á ekki að gera að hún lítur á mann bljúg og undirleit og segir "eggi reidu"!

Annars verð ég að segja að ég upplifði eitt nýtt í dag. Sykurmolana og handbolta, mjög merkileg blanda og ótrúlega neytendavæn. Þannig er mál með vexti að Báru finnst ofsalega gaman að dansa. Henni finnst til dæmis mjög gaman að hollensk-íslensku-afrísku grúppunni LANYI. Enda er þeirra tónlist mjög dansvæn. Undanfarið hefur hún verið að færa út kvíarnar og prófa klassíkina. Henni finnst til dæmis mjög gaman að Symphonie Fantastique eftir Berlioz og Carmina Burana eftir Orff. Hún hoppar og skoppar og hringsnýst við það. Núna í dag var ég að fylgjast með undanúrslitunum á EM, með einum þriðja af öðru auganu. Jæja ok með helmingnum af því...jæja ok með öðru auganu. En alls ekki meira! Þá vill hún endilega dansa og finnur disk sem hún hefur ekki spilað áður og hitti á sykurmolana...remix disk með þeim. Blue eyed pop og motorcrash og fleiri "óþekkt" lög endurhljóðblönduð. Hundgamalt drasl, Það með handboltanum Króatía versus Slóvenía var alveg ótrúlega súrrealískt. Mæli með því Ef þið hafið tök á. - Nei ég vil ekki tala um íslenska handboltalandsliðið. Við Bára verðum ein í kotinu þangað til næstu helgi Þegar Ásta, Silja og vinkona Silju...Unnur koma hingað á Þorrablótið. Kannski að maður byrji keppni í hinni miklu spurningarkeppni kvöldið eftir þann áttunda? Veit það ekki hef ekki fengið neitt að vita um það ennþá...kemur í ljós...kemur í ljós. Það verður örugglega eitthvað um það þegar þar að kemur.

2004-01-22T15:04:00.000Z

Jæja þá er maður nýkominn úr líkamsræktinni! Tók mér lokst það verk fyrir hendur að moka snjóinn sem hrúgaðist upp á útidyrahurðinni. Við komumst út annarstaðar þannig að maður var kannski ekki að flýta sér að þessu verki. Þetta voru 1,5 metra háir skaflar. Samt hefur nú bráðnað örugglega hátt í meter síðan um helgina. Núna er maður kominn aftur inn og endorfínið alveg á fullu. Ég er meira að segja ekki frá því að maður hafir svitnað aðeins í "áfram Ísland" bolinn sem ég skartaði í skólanum í dag í tilefni dagsins. Er það ekki alveg í takt við tilefnið að svitna svona aðeins...taka aðeins á þessu eins og "strákarnir okkar"? Allavega áfram Ísland núna á eftir. Já by the way sjómmið er í lagi í augnablikinu! Hjúkk!

2004-01-21T14:09:00.000Z

Arg nú man ég hvað ég ætlaði að gera fyrir 17. janúar (þann örlagaríka dag)! Það var að endurnýja áskriftina að léninu sem ég fékk mér. En einhvernvegin fórst það alveg fyrir! Ég bara veit ekki hvernig stendur á því. Jæja, þýðir ekki að fást um það. Nú þarf ég bara að finna upplýsingarnar um hvar það var og það allt. En á meðan er engin heimasíða. Hún hafði svo sem ekki verið uppfærð lengi þannig að skaðinn var kannski ekki mikill. En það versta var að myndin hérna á bloggsíðunni var geymd á heimasíðunni og þar af leiðandi er hún ekki lengur, bara þetta litla tíkarlega x. Finn eitthvað sniðugt út úr því...en ekki núna. Nenni því ekki. Þannig að þetta litla tíkarlega x verður eitthvað áfram á síðunni. Sorry.

Svo maður kvarti nú aðeins þá er bíllinn, já númeró trois eitthvað að leiðinlegast. Kúplingin eitthvað á síðasta snúningi eða búin. Og sjónvarpið að deyja. Stundum þegar kveikt er á því kemur hljóð en skjárinn er hvítur...og stundum dettur það inn. Og evrópukeppnin er að byrja á morgun! Hvað hef ég gert!

2004-01-15T23:54:00.000Z

?Það er kannski kominn tími á að maður láti heyra í sér á þessum vígstöðvum. Það er augljóst að ef áramótaheitið mitt var að blogga mikið í byrjun þessa árs þá hefur það hrapalega misfarist. En þar sem ég strengi nú fá nýársheit ef nokkur þá gerir það ekkert til. Nú hefur maður tekið sér lengra leyfi en nokkurt jóla eða skólaleyfi segir til með að maður megi taka sér. Það sem hefur skeð síðan síðast er ekki mikið...eða hvað? Ég fékk ekki dvd-ið með U2. Hvorki Ásta né nokkrir aðrir tóku þessu hinti. Hrmmpf. Segi ég og skrifa eins og Andrés önd og meina það eins og honum einum er lagið. Ástu fanst meira að sega fram á Þollák, þega hún var að spyrja mig hvað mig langaði í jólagjöf, að ég ætti bara að leigja þetta við tækifæri. Það væri alveg nóg! Ég fékk æðislega gjöf frá henni og Silju, þó ekki hafi það verið dvd-ið. Það er of langt mál að fara út í það hvað það var. Nóg er að segja að það innihélt gömul fluguveiðiflotholt sem bókamerki, handskrifaðan texta, ílát búið til úr indverskum mjólkur og tóbakdósum, brjóssigg, kábojjnælu og hnappa. Svona svo maður nefni eitthvað. Treystið mér það er of langt mál að útskýra það. Það er nóg að vita það að við erum bæði jafn klikkuð, sérvitur og “sökkerar” fyrir gömlum og fáránlegum hlutum. Ég þó heldum meira ryðguðum.

Fórum norður á milli jóla og nýárs eftir “fyrstu jólin” í íbúðinni á Bestó. Höfum oftast verið hérna fyri r norðan en sunnan um áramót. Snérum þessu við núna. Ekki slæmt. Tímdi ekki /nennti ekki að kaupa rakettur um áramótin. Lét mér nægja að horfa á hina og kveikja á stjörnuljósum fyrir stelpurnar. Munaði líka um að Bára Örk var búin að vera eitthvað slöpp þarna. Tókum þetta út á þrettándanum með því að kaupa fullt af blysum, það fannst henni og Silju gaman. Ég var með rautt sagði hún og pabbi með hvítt og púmmm þegar hún var að lýsa blysunum. Silja með stjörnuljós. Og hendurnar fara á fullt þegar hún lýsti þessu, púmminu og ljósinu.

Fyrir þá sem hafa ekki fylgst með blogginu hjá konunni minni þá skal það upplýst hér og nú að ég tók við hlutverkinu ofurmenni (samanber blogg hennar) sunnudaginn 11. janúar. Þá fór hún suður og eftir urðu stelpurnar og verða hjá mér til vors þar til Ásta kemur til okkar eftir að klára kennsluréttindanám í LHÍ en því miður ekki margmiðlunarskólann. Hvað hefur gerst síðan þá júbbs það var kennsla fyrstu vikuna í janúar Silja og Bára Örk eru alveg að rúlla skólanum og leikskólanu upp. Kennsla á mánudeginum í vikunná eftir. Mánudeginum eftir að Ásta fór en síðan ekki söguna meir. Síðan á þriðjudeginum hefur ekki verið skóli hérna. Hérna hefur verið blindbylur og vindur þannig að manni er best að hafa sig innandyra. Ég var að vona að það lægði eitthvað í dag, en gerði ekki. Hvað með morgundaginn verður veit enginn. Það er ekki gott útlit í augnablikinu. Við sjáum til hvað verður. Þetta bjargast hérna, nógur matur enn til. Helst að kerti vantar. Sem betur fer hefur rafmagnið ekki dottið út nema í einhverjar 20 mín til hálftíma í gær. Svo það væsir svo sem ekki um okkur. Nóg af bókum til að lesa, dóti til að leika sér að og ef í harðbakkan slær videó og Litla ljóta lirfan í 658 skipti. Merkilegt að maður skuli ekki vera komin með leið á henni og ennþá geta hummað með Bjögga og dóttur í söng sínum á þrastapabba og þrastamömmu.

Jamms núna semsagt er maður einn með dóttur og stjúpdóttur, í fjarbúð frá konunni sinni. Mér er sama þó það sé eitthvað tískufyrirbæri, það sökkar að mörgu leiti. Ætlar að vera skólastjóri lítils sveitaskóla á ströndum, góður kennari og allt það! Og reyna að vera í 2,5 einingu í fjarnámi í KHÍ. Fyrir utan að sækja um styrki fyrir námsverið hérna á Drangsnesi og koma því á fót. Og allt hitt! Ég ætlaði reyndar að vera í fimm einingum til viðbótar í framhaldsnáminu. Var búinn að skrá mig í 5 eininga kúrs í stjórnun í KHÍ. Já maður er ekki ofurmaður fyrir ekki neitt. En því miður, bla, bla, þetta var einhver kúrs sem var framhald af öðrum kúrs sem var hálfgerð skylda að vera búinn að taka í stjórnun. Ekki það að það hafi nokkurstaðar verið sagt. Þú ert jú skráður á tölvu-og upplýsingatæknibraut í framhaldsnámi. Ef þú ætlar að taka áfanga í stjórnum myndi það bara fokka upp (ath ekki orðalag þess sem sagði þetta við mig fyrirhönd KHí en það var í orðanna hljóðan) náminu sem þú ert í núna. Best að klára það með lokaverkefni og síðan að fara í stjórnun og taka þar þá kúrsa sem þú vilt. Kannski geri ég það...kannski ekki! Gamli pönkarinn að koma upp í mér...nei ég þekki Árna Magnússon ekkert en litla bróður hans Pál Magnússon ágætlega. Hann var sko enginn pönkari...held að hann hafi verið framsóknarmaður frá fæðingu.

Nóg um það í bili. Ég held að ég kalli þetta gott í kvöld. Farinn að reyna aðeins við DaVinci lykilinn. Restin af jólabókunum. Búnar eru Harry Potter, Sjón og og Skugga-Baldur, og Bóksalinn í Kabúl. Hvar væru jólin án bóka. Hvar væri í raun lífið án bóka. Segir maðurinn sem las lítið á síðasta ári en vill samt lesa sem mest!

Over and out vona að þetta komist í gegnum hríðarbylinn.

2003-12-17T00:57:00.000Z

Föndurdagurinn tókst vel. Ég sló í gegn með jólaöli og piparkökum á mannskapinn...stundum þarf ekki mikið til! Allir voru í jólaskapi og föndruðu snjókarla-póstpoka...ákváðum að snjókarlar yrðu þemað í ár. Þannig að það eru litlir snjókarlar eru út um allt í skólanum ásamt músastigunum, ávallt klassískir! Jebb, núna er skólinn vel skreyttur og hellingur af jólaseríum...núna erum við komin í stíl við alla hina. Það vantar bara blikkið. hehehehe það kemur kannski seinna...eins og sexið. Það eina sem vantar upp á er útiserían, það dóu nokkrar perur á milli jóla og afleysingarnar komu ekki fyrr en í dag og fara á sinn stað á morgun.

Annars er það helst að frétta að löggan kemur í skólann á morgun. Nei ekki til að hirða mig eða neinn annan upp. Heldur til þess að halda smá tölu yfir nemendum um endurskinsmerki og umferðaröryggi. Ég hafði samband við þá í haust og þetta hefur verið að frestast hingað til, næst síðasta dag fyrir jól. Betra er seint en aldrei. Kannski verður þetta svona fastur punktur í örugglega annars svo "lausa í reipunum síðasta kennsludeginum fyrir jól"? Kannski?

Annars er ég að huga að jólagjöfum fyrir vini og ættingja. Veit ekkert hvað mig langar sjálfan í! Það er svona að vera orðinn gamall og eiga allt. Jú bækur eru klassískar. Langar helst í Sjón og Hallgrím. Samt ekkert svona sem togar rosalega í ekkert sem maður verður að lesa eða eignast af bókunum...ekki einu sinni þeir. Kannski að ég reyni að leggja höfuðið í bleyti og koma upp með einhvern óskalista. Jú, "U2 live at Slane Castle" DVD-ið mig langar í þá...en Ásta veit það! Það er svarið sem hún hefur fengið þegar hún spyr hvað mig langar í. Kannski verða þetta svona jól sem maður segir bara þegar allir spyrja mann að þessu..."surprise me!" hehehehe. Jæja, hættur að bulla og finna jólabindi fyrir morgundaginn...það er úr svo mörgum að velja.

2003-12-15T22:37:00.000Z

Hér kemur videóið sem ég var að tala um í gær. Ekki mikil gæði en í staðin ætti það ekki að vera lengi á leiðinni. Smá jólakveðjur héðan frá Drangsnesi :)

Það væri kannski ekki úr vegi að biðja Palla bróður, sem er einhverstaðar í Bandaríkjunum í doktorsnámi í stærðfræði um smá greiða. Reikna út frá þessum myndum hvað hvert heimili í, segjum bara, Reykjavík þyrfi að skreyta mikið. Hve margar seríur það þyrfti. Miðað við að þessar myndir sýna helminginn af hundrað manna (tæplega) þorpi. Bara svona upp á gríðnið.

2003-12-15T01:11:00.000Z

Eru ekki allir að komast í jólaskap. það er nú ekki seinna vænna! Í dag var bingó hjá nemendafélaginu í skólanum. Mjög vel heppnað hjá þeim og þau eiga heiður skilinn fyrir það. Ég fékka að vísu ekki aðalvinninginn, DVD og snakkpoka. Ég var með 3 spjöld og átti bara eina tölu á þeim öllum! Mér finnst að það ætti að vera einhver aukavinningur fyrir það! Annars get ég ekki kvartað. Fékk tvo vinninga. Annars vegar ógeðslega flott glær stígvél, verst að þau voru númer 29. Það verður bara einhver annar ánægður með þau. Ég er að hugsa um að leita þessa búð sem er með þau upp og fá mér ein. Þau eru næstum kúlaðaðri en túttur! Með þessum stígvélum fylgdi títuprjónapúði og prjónahaldarar. Einmitt! Síðan fékk ég eitthvað svona kántrí-jólaföndur-hurðarkrans-skreytingar-dæmi. Verst hvað ég er lítið hrifinn af svona kántríi! :) Merkilegt aðég hafi fengið einhvern vinning vegna þess að oftast er ég með eindæmum óheppinn og óratvís á allar svona tölur í lottó-happadrættis-veðji. Ég held til dæmis að ég hafi bara fengið tvær réttar tölur í þessi fáu skipti sem ég hef spilað í lottóinu. Það hefur kannski eitthvað með það að gera?
Síðan skrapp ég yfir á Hólmavík og kíkti á jólamarkaðin þar og verslaði einhverjar jólagjafir þar. Allt voða jóló!

Á morgun er síðan jólaföndur dagur í skólanum. Ég ákvað að það væri bara tekinn einn dagur í þetta, ekkert verið að klípa aftan af, framan af eða úr miðjum tímum. Bara klára þetta! Það verður semsagt dúndrandi jólatónlist, piparkökur og jólaöl og allir með jólasveinahúfur og skólastjórinn með jólabindi í Drangsnesskóla á morgun. Jibbý jei, ég hlakka til!

Ég brá mér líka út áðan og tók smá videó af skreytingargleðinni hérna á Drangsnesi. Við erum sko mest og best hérna! Ég ætla að reyna að koma því hérna á morgun.

Jæja...over and out...farinn að finna jólabindi fyrir morgundaginn.

2003-12-12T00:07:00.000Z

Ég veit ekki hvað þetta er með skeiðina? þessi hérna er búinn að pæla í Matrixinu og er með þetta allt á hreinu. Hann meira að segja er með skeiðina (skrolliði bara soldið niour til að tékka á því) en hann vill bara meina að krakkinn hafi bjargað Neo með því að gefa honum hana. Ég veit það ekki ég vill meina að það sé eitthvað meira þarna á bak við? Kannski ætluðu þeir sér eitthvað meira með skeiðina þeir Wachowski bræður (veit einhver hvað þeir heita?) og gleymdu því á milli mynda. Ég get sosum ímyndað mér að þeir hafi haft um slatta að hugsa og að gleyma einni skeið. Huh, hvað er ein skeið sosum. Ég veit það ekki þessi skeið er ennþá að bögga mig. Ætli ég verði ekki bara að setja trílógíuna á jólagjafalistann og leggjast í pælingar og komast að þessu. Annars langar mig éiginlega bara í DVD U2 lææææv í í Slane kastala á Írlandi það er auðvitað bara af því að þessi vefleiðangur fjallar um einmitt þessa tónleika. Annars er ég lítið búinn að lesa af bókum og einhvernvegin ekki mikið búinn að mynda mér skoðun og setja á óskalista...það er mjög óvenjulegt! Venjulega er bókalistinn sirkabát sona hálfur kílómetri fyrir jólin. Svo margt sem langar að lesa. Það er sosum ekki óvenjulegt þegar maður er haldinn "bibliophiliu" (sjúklegri áráttu í bækur). Einhverra hluta vegna er ekki svo núna. Ég er búinn að lesa Bergsvein og landslagið hans og finnst hún frábærlega góð. Er að lesa Harry Potter (númeró þínkó)...and that´s it! Kannski er mikið að gera hjá manni? Kannski er maður að verða gamall? Og ég sem hélt að maður ætti að hafa nógan tíma til að, til dæmis, lesa þegar maður eltist! Hrummmmpf það væri sosum auðvitað svo væri ekki!

2003-12-11T00:49:00.000Z

Þetta er margmiðlun! Bara svo þú vitir það. Ég ætlaði að ver löngu farinn að sofa. Vakti lengi fram eftir í gær til að vinna að verkefnum og öðru sem legið hefur á hakanum. Núna er ég með sjónvarpið á og Mósaík er endursýnt. Ég er með sjónvarpið á vegna þess að ég er ekki með útvarp og ég nenni ekki að finna einhverja diska eða plötur til að setja á á og hafa sem einmennings-uppfyllingar-hljóð :) Hver er í Mósaík nema Björgvin Gísla og það er verið að segja frá plötu sem hann gaf út af því hann varð 50 ára í 50 eintökum en hún er líka netinu. Af því að ég var á netinu að leita að einhverju sem tengist annari heimstyrjöldinni og jólum og samfélagsfræði. Það er ég er að kenna samfélagsfræði...við erum að fjalla um WW2 og það eru að koma jól! Var ekki að finna neitt og næstum kominn í fýlu. En eins og Tom Barman í Deus sagði..."It's a James Brown thing...just say yes." En Björgvin Gísla... ég fór að finna síðuna...svo ég finndi eitthvað. Fann hana hún er hér platan er þarna MP3 og ekki gleyma umslaginu. Þetta er svona rólegheita plata...er það ekki það sem maður þarf í jólastressinu! Þegar maður finnur ekki neitt á netinu sem maður er að leita að. Hrummmpf! Njótið Björgvins og Deus. Hvorutveggja nokkuð sem allir ættu að hafa gaman og gott af! :)

2003-12-09T23:23:00.000Z

Það er alltaf gott að fá hugmyndir. Ennþá skemmtilegra er að vinna að þeir, ef þær eru þess verðar og skemmtilegast er að sjá þær verða að veruleika. Var að enda við að skrifa bréf og greinargerð til hreppsnefndar Kaldrananeshrepps sem ég vona að verði tekin fyrir á fundi þeirra næsta mánudag. Þar sem ég er að vona að ein hugmynd mín verði að veruleika. Í bréfinu er ég að betla pening (hvenær er maður ekki að því! :) til að þessi hugmynd mín geti orðið að veruleika. Þeir sem hafa áhuga á að vita nánar um hvað málið snýst geta svosem komist að því hér. Ég hef nefnilega ákveðið að tala ekkert um þetta opinberlega fyrr en eitthvað ákveðið er komið á blað sem tryggir að þessi hugmynd mín komist á koppinn...og hels kopp sem flestra sem auðvitað eiga að míga sem flestum og mestum peningum í það! En ég ætla að koma henni á koppinn. Það er eitt sem víst er, þetta er ein af þessum hugmyndum sem verður að komast á koppinn...vantar þig kopp til að míga (pjjjjjééééééééning) í?

2003-12-02T12:10:00.000Z

Mikið rosalega getur skammdegið verið flott. Sit hérna á skrifstofunni og sólin er að koma upp fyrir fjöllin núna rétt yfir tólf. Síðan speglast hún á hafsfletinum og öldurnar rétt gára sólargeislana sem í þeim speglast. Æiiii nú er hún komin aðeins hærra á loft og er bara beint í augun á mér og eyðilagði alveg þessa flottu skammdegismynd sem ég hafði verið að mála upp. Svona er þetta! :)

2003-12-01T13:56:00.000Z

Þetta fer nú bara að vera seim óld...seim óld hérna. Það heyrist ekki í manni nema til að segja frá helgarafrekunum. Ég brá mér semsagt í bæinn. Já nema hvað! :) Og hvað gerði maður um síðustu helgi jú fór í bíó. Til hvers að breyta út af vananum! Nú var farið að sjá brasílísku myndina Borg Guðs. Það eina slæma við hana var að hún var klukkan hálf sex á sunnudeginum. Bára Örk fór í heimsókn til vinkonu sinnar hennar Sólveigar Blær og við hjónin skunduðum í bíó. Þetta er mögnum mynd ég mæli með henni. Eftir mynda var brunað á "númeró trois" norður yfir heiðar því að maður þurfti að mæta í vinnu í morgun. Sem sagt allir út í bíó að sjá Borg Guðs.

En mig vantar ennþá einhvern sem getur sagt mér hvað þetta var með skeiðina!

2003-11-24T16:05:00.000Z

Skrapp í bæinn á "númeró trois" um helgina. Hann kom fínn til baka úr hressingardvölinni frá Hólmavík. hann hafði hlaupið yfir á tíma einhverra hluta vegna??? Eins og einhverjir myndu segja: "This is all a very bizare case" því það var víst nýbúið að skipta um tímareim rétt áður en hann var verslaður af vorum höndum. Enöff of ðat! Fór í bæinn afrekaði það m.a. að taka Matrix II á videói á föstudeginum (aðeins að rifja upp) og svo fórum við hjónin í bíó og sáum númer þrjú á laugardeginum. Ég verð nú að segja eins og Palli bróðir átti nú ekki von á miklu eftir númer tvö sem sem fókuseraði um of á langdregin slagsmálatriði. En númer 3 kom á óvart...og svo er fólk að segja að trúarþemu sjáist ekki (eða lítið) í bíómyndum!

Það er samt eitt sem ég er að velta fyrir mér...hvað með skeiðina!!!?

Fyrir þá sem ekki muna eftir því þá er eitt atriði í Matrix 2 þar sem Smith ætlar að skera Neo (væntanlega á háls) á Síon þar sem hann er breyttur eins og einn þaðan en er truflaður af aðdáanda Neo og viðhengi, þessum uppáþrengjandi sem brillerar í númer 3, þegar hann gefur honum skeið. Um leið og hann gefur Neo skeiðina, þá segir hann þessa setningu: "Þetta er frá einu af munaðarlausu börnunum, það sagði að þú vissir hvað þú ættir að gera með hana". Verandi alinn upp í bókmenntafræðinni þá fór ég að lesa út úr þessu. Fyrst að skeiðin kom ekki meira við sögu í númer 2 hugsaði ég að hún hlyti að koma eitthvað við sögu í númer 3. Það meikar alveg sens er það ekki? Ég meina það þarf engan stærðfræðing til að sjá það (no offence Palli :) er það? Nú leið og beið á mynd númer 3 og alltaf hélt ég að skeiðin myndi koma eitthvað við sögu að Neo myndi nota hana til að verjast Smith þegar hann blindar hann. Að hann hefði látið uppáþrengjandi viðhengið fá hana aftur á Síon og hann myndi nota hana til að spenna hliðkeðjuna í sundur. Að hún yrði síðasta leynivopnið þegar Smith nær að breyta Neo eða bara eitthvað! En nei aldrei kom bévítans skeiðin! Þannig að ég spyr bara enn og aftur...jóla hvað, viðössumumessiggi.

Hvað var þetta með skeiðina?

2003-11-17T22:15:00.000Z

Þemavikan fór af stað í morgun í skólanum og gekk alveg bara ágætlega í dag...þó svo ég segi sjálfur frá hún rúllar áfram út þessa viku. Enda heitir þetta nú einu sinni þemaVIKA! :). Annars verð ég nú að þakka honum Jóni Jónssyni fyrir að hafa laumað mér inn í fjölskyldu sína og tenglasafnið á Strandir.is . Ég sé nefnilega á fríteljaranum mínum frá teljari.isá blogginu hvaðan fólk er að koma og ég sé að það eru einhverjir að laumast af strandasíðunni til þess að kíkja á þetta mal mitt hérna. Í óspurðum fréttum sagði Björg systir mér að hún væri búin að henda upp síðu í tengslum við nám sitt í KHÍ...hér er lítil sæt smella yfir á hana. Set hana líka í tenglasafnið (aka fjölskyldualbúmið! :)

2003-11-14T17:26:00.000Z

Ekki kemst maður í bæinn þessa helgina að heilsa upp á stelpurnar sínar. Subaru númeró trois fór í eitthvað stríðnisskap í vikunni. Neitar að fara í gang. Nú verður maður að draga hann yfir á Hólmavík, þar sem er vélsmiðj...ég meina verkstæði. Kannski að maður noti tímann til að vinna upp slugs í fjarnámi og klára að undirbúa þemaviku skólans sem hefst á mánudaginn. Já nú er maður að komast að því hvernig er að vera fluttur út á land. Ég er svo sem ekkert viss um að ég hefði komist fyrr að á verkstæði í bænum en það væri kannski styttra í það. Nú svo er líka annað sem maður kemst að út á landi er að ruslahyrðan er öðruvísi en í bænum. Það er ekki það að hér sé notaður fullkomnast sorphirðubíll ekki bara á Íslandi heldur Norðurlöndum já gott ef ekki bara í heiminum. Og það er ekki það að maður þurfi að setja poka sjálfur í eftir að búið er að hirða ruslið manns. Heldur það sem mér finnst magnað er að hér fer maður í kaupfélagið og fær úthlutað 50 og eitthvað pokum þannig að maður á að vera "seiv" fyrir árið, með poka. Já það er margt sem er öðruvísi en í bænum. Svona borgarbörn eins og ég komast sko aldeilis að því. Fyrst ég er farinn að tala um kaupfélagið. Þá er það opið til sex og ekki um helgar. Það er ekkert 10-11 eða opið til hálf tólf. Þetta er eins og að hoppa í gamla daga. Já, eins gamall og maður er þá man maður eftir því að búðir lokuðu klukkan sex og voru ekki opnar um helgar. Það var ekkert sjónvarp á fimmtudögum og rafmagnið fór jafnvel stundum af. Sem minnir mig á það að rafmagnið fór tvisvar af í síðustu viku. Eins gott að maður var ekki að vinna í tölvunni þá! Jæja, ég held að ég hætti áður en maður dettur í algjört nostalgíu kast.

2003-11-11T16:59:00.000Z

Er aðeins búinn að vera að fikta í útlitinu hérna...endilega látið mig vita hvernig ykkur finnst þetta. Er þetta til bóta eða vansa? Annars svo sem lítið að frétta héðan úr rigningunni. Nema það að nýja flotta örbylgjutengingin frá Snerpu hefur ekki verið að virka upp á síðkastið og við komumst að því að einn sendirinn hérna í þráðlausa netinu sem við tókum í skólann er ekki að virka sem skildi. Eitthvað með að hann sér alveg lynux serverinn og nær að kjafta við hann en er ekki að ná að senda merkið áfram! Bömmer...en það er nýr sendir á leiðinni á morgun og þá verður vonandi kátt í höllinni og þetta fína samband á netið komið til að vera. Fjári slæmt að sjá þegar maður kveikir á tölvunni að þráðlausa netið sýnir "excellent" samband en komast ekki á netið. Nú svo er líka vinna við að skipuleggja þemadagana sem hefjast í næstu viku og eru byggðir lauslega en þó allnokkru leita á Landnámsaðferð Herdísar Egilsdóttur.

2003-11-08T22:09:00.000Z

Já, já eitthvað er nú orðið langt síðan maður leit inn hérna síðast og setti eitthvað inn. Einhver var að að skjóta eitthvað á mann fyrir það og eitthvað var minnst á bloggheit frá fyrsta október. Það var vetrarfrí í þarsíðustu viku í grunnskólunum í Reykjavík en hérna á Drangsnesi á mánudag og þriðjudag. Stelpurnar mínar í bænum ætluðu að koma hingað norður á miðvikudeginum en af því að bíllinn dó hjá þeim í bænum eins og hægt er að lesa um hjá konuninni minni þann 29 október síðastliðinn. Þannig að hvað var til ráða, nú nema að skjótast í bæinn á miðvikudeginu að ná í þær og svo aftur til baka um kvöldið svo maður gæti mætt í vinnu á fimmtudeginum. Nú svo var skotist í bæinn á sunnudeginum og aðeins að anda að sér "siðmenningunni" já og versla bíl svo að þær í bænum gætu um frjálst höfuð strokið...já og komist allra sinna leiða. Hvort sem það er hér norður fyrir heiðar, í Bónus eða í skólann á morgnana.

Annars er ég búinn að vera að fylgjast með í sjónvarpinu söfnun fyrir Sjónarhól. Búinn að hringja og styrkja þau, ekki bara vegna þess að þetta er þarft málefni. Heldur vegna þess að það er ekkert sjálfgefið að maður eignist heilbrigð börn. Maður verður að styrkja þá sem þurfa hjálp vegna veikinda barna sinna. Við erum jú ekkert sterkari en veikasti hlekkurinn, veikasti bróðir okkar eða systir. Og ef við getum ekki stutt við veikasta hlekkinn...ja hvar erum við þá stödd? Segji ég...skrifa...og bara spyr. Yfir og út, ekki meira í bili...kannski meira síðar! :)

2003-10-16T01:00:00.000Z

Próf...próf...próf...Það eru allir í prófum. 4. og 7. bekkur hérna á Drangsnesi eru að fara í samræmd próf í stærðfræði á morgunn og íslensku á föstudaginn. Palli bróðir er nýbúinn í prófi í línulegri bestun út í Pittsbúrg í gúdd óld Júúúú Esss off Eiiii. Því mikla rigningarbæli :). Segiði svo að maður vitni ekki í skyldmenni sín! :) Nú svo var Björg systir í prófi í stærðfræði, engin heimasíða eða blogg sem ég veit um :( . Hún fékk hjálp frá Jóhönnu kærustu hans Palla. Henni (Björgu) gekk vel í prófinu, hef ég frá mömmu.

Annars er það að frétta að Silja síbylja, fóstudóttir mín er að verða 11 ára núna um helgina.
Sendið henni póst ef þið viljið óska henni til hamingju með daginn! Það verður eitthvað húllumhæ um helgina út af því enda á hún afmæli á laugardaginn þann 18. Ekta partídagur! :)

2003-10-12T17:10:00.000Z

Þetta fór nú ekki alveg eins og maður spáði í gær. Ég vitna nú bara í stuðningslagið á baggalút: Áfram Ísland. Jafnvel þó við getum ekki neitt! Nú er bara að sjá hvort við fáum ekki fínan riðil fyrir undankeppni í HM. Hverjum er ekki heldur sama um einhverja Evrópukeppni! Núna komumst við bara í staðinn á HM! :)

2003-10-11T14:15:00.000Z

Nú er bara klukkutími í leikinn. Þannig að maður hlustar bara á hvatningarlagið á Baggalút aftur og aftur og aftur...enda er það algjör snilld. Hérna fyrir norðan er æðislegt veður glampandi sól og fínn hiti þannig að maður er bara kominn á stuttermabolinn

Tilbúinn í leikinn eins og þeir úti í Hamborg. Leikinn sem fer 1:0 fyrir okkur! Nú förum við bara alla leið!

2003-09-30T00:11:00.000Z

Það er nú orðið soldið síðan síðast var sett eitthvað á "blað" hérna. Nóg svosem verið að gera! En nú get ég ekki setið á mér lengur. Fór á tónleika í kvöld með Bubba Morthens í Bragganum á Hólmavík. Þetta voru soldið sérstakir tónleikar. Ekki að þetta væru fyrstu tónleikarnir sem ég fer á með Bubba. Nei, þetta voru fyrstu tónleikarnir sem ég fór á með honum út á landi. Hef bara farið á tónleika með honum í bænum. Þar hefur maður verið með jafnöldrum eða því sem næst á tónleikunum. Núna upplifði ég það sem hann hefur oft verið að tala um á þeim tónleikum...tónleika út á landi. Til dæmis þetta breiða aldursbil ætli sá yngsti á tónleikunum hafi verið um tveggja og sú elsta...ja, ég ætla ekki að fara að móðga neinn ef ég bæti einhverjum árum við, en ég myndi segja í kringum sjötugt. Mögnuð upplifun eins og alltaf að fara á tónleika með Bubba. Skemmtilegar sögur sem fylgja alltaf í spjalli Bubba og ekki skemmir fyrir að mér finnst hann aftur vera farinn að hafa skoðanir á hlutunum...fannst hann soldið sleppa því á tímabili. Semsagt ýkt stuð og kúl...en samt allt öðruvísi en síðasta ýkt stuð og kúl sem ég sagði frá tónleikunum með "brjáluðu" rúmensku síguna lúðraþeyturunum í Fanfare Ciocarlia. Smá tenging Bubbi talaði um virkjunina fyrir austan (mátti sosum búast við því) og honum fannst að landsmenn ættu að safna í kuldagalla handa portúgölunum sem eiga varla fyrir leistum og vettlingum. Honum fannst fyndið til þess að hugsa hver svipurinn yrði á Davíð og þessum köllum ef það yrði gert! Tengingin? Jú...konana mín, ofurkonan fjallaði einmitt um þetta á blogginu sínu um daginn! Heheheheheheh og þið hélduð að þetta væri einhver djúppæld tenging

2003-08-25T11:16:00.000Z

Í morgun var flaggað, farið í sparifötin og skólinn settur. Það er örugglega svona 17-18 stiga hiti hérna og algjört logn. Við vorum að tala um það kennararnir að kannski þyrfti að senda einhvern upp í fánastöng að blása svo að fáninn blakti. Þá vorum við tekin á orðinu og einhver smá vindgola myndaðist í kringum fánastöngin og strekkir á fánanum. Frábært! Skólasetningin gekk vel og nemendur og foreldrar sem mættu létu vel af og virðast allir tilbúnnir að takast á við veturinn. Lómurinn grenjar hérna fyrir utan. Sennilega svona meðvirkur með nemendunum sem eru að byrja aftur í skólanum.

2003-08-05T10:43:00.000Z

Jæja, búinn að vera í smá sumarfríi frá skrifum. Sá tími hefur að mestu farið í að pakka niður og græja ýmsa hluti fyrir flutninginn, þó allt hafi ekki náðst ennþá. Fluttum síðan á föstudaginn var. Þetta er sem sagt fyrsti dagurinn í nýju vinnunni. Það er drottins dýrðarinnar koppalogn hérna á Drangsnesi og steikjandi hiti. Ég hef útsýni yfir sjóinn og heitupottana út um skrifstofugluggann. Hvernig á maður að geta unnið í þessu veðri!!!

2003-06-27T15:00:00.000Z

Í mogganum þann 25. var eftirfarandi sagt um afmælisbörn dagsins: "Frumlegar hugmyndir og öflugt ímyndunarafl einkenna þig. Þú ert hugsjónamanneskja og því á undan þinni samtíð." Og hana nú! :) hehehehe.

Annars var annar í afmæli í gær. Konan mín hún Ásta bauð mér á tónleika sem áttu að vera þann 25 á afmælisdeginum sjálfum en voru í gær. Það voru tónleikar með Fanfare Ciocarlia!!!! Brjálað balkanskt sígunastuð á Nasa í gærkvöldi. Það voru nokkrir lítrar sem maður svitnaði þarna á dansgólfinu! Þetta nálgaðist barasta Rússíbanaball! Eða einsog einhverjir myndu segja...Geeeeeeðveiiikt stuuuuuð (með ákveðnum hreim svo allir viti hvað þetta var ýkt kúl og frábært þarna í gærkvöldi!!!

2003-06-25T08:31:00.000Z

Merkileg þessi kennitala manns! Fyrri hlutinn af minni, afmælisdagurinn fyrir þá sem eru ekki enn búnir að átta sig á því, er 250670. Hei, vá...það þýðir að ég á afmæli í dag! Varð bara að fá að deila þessu með ykkur! :) 2003 mínus 1970...jebbs það þýðir að maðurinn er orðinn 43 ára eins og Ásta reyndi að stríða mér með í morgun...eða kannski bara 33. Allur þessi aldur og maður er samt þetta sprækur :) ég er bara nokkuð ánægður með þetta!

2003-06-24T12:06:00.000Z

Það er svo sem lítið að frétta búinn að vera að sinna vettvangsnáminu hjá Námsgagnastofnun. Þar er ég að búa til gagnvirkar æfingar, semsagt upphugsa þær og setja niður frá A til Ö fyrir forritara og teiknara, sem verða síðan settar á vefinn hjá þeim. Þetta hefur tengst fjörunni og hafinu vefnum þeirra, íslensku verkefni og svo síðan komdu og skoðaðu bókaflokknum...Þetta er búið að vera gaman og líka fræðandi að fá smá nasasjón inn í þennan heim sem Námsgagnastofnun er. Nú svo er ammlið manns á morgun 1970 mínus 2003...já það þýðir að maður verður 33 ára! Helgin verður svo notuð í það að skjótast norður á Drangsnes og ganga frá nýja djobbinu. Svo eru líka einhver verkefni í þessum kúrsum sem maður er í...já shit! :) hehehehe maður verður greinilega að fara að skipuleggja sig.

2003-06-16T09:53:00.000Z

Fékk í gær símtal frá Óskari formanni skólanefndar Drangsnesskóla og þeir samþykktu að ráða mig sem skólastjóra þar. Þannig að nú fara einhverjir breytingartímar í hönd. Nú er bara fullt af hugmyndum að fæðast um hvað og hvernig hægt er að gera ýmsa hluti þarna fyrir norðan.

2003-06-13T11:54:00.000Z

Það er aðeins að teygjast á milli daga þar sem skráð er...átti maður ekki að skrifa 3 sinnum í viku hérnar! ;) Nei námskeiðinu er lokið! Samt er ennþá námskeiðinu ólokið ef maður tékkar á einkunninni á vefnum hjá KHÍ. Maður er ekkert betri en aðrir nemendur með það að maður vill fá einkunnir strax og helst um leið og maður er búinn að skila. Steinbúinn að gleyma að það þurfi að fara yfir alla þessa verkefnahrúgu! En fyrst að námskeiðið er búið þá þýðir það að...að...já annaðhvort heldur maður áfram að blogga fyrir sjálfan sig eða hættir því bara alveg. Spurning hvort að maður setji sömu kvöð á sig að skrifa 3 sinnum í viku! ??? :) Annars er nú slatti að gerast hjá manni. Ég er hérna niðri í Námsgagnastofnun núna í vettvangsnáminu, Hallgrímur er hérna líka. Nú og síðan er 95-98,5% líkur á að ég breyti um starf aðeins! Ja, kannski meira en aðeins Ef ég fer norður á Drangsnes til þess að verða skólastjóri! Dí talandi um smá breytingu

Annars er Lára Stefánsdóttir líka eitthvað að monnta sig af talandi blogginu sínu kíkið á það...þetta er algjört brill! :)

2003-05-26T20:01:00.000Z

Lokaverkefnið er komið á vefinn. Svona til prufu. Sjá hvort það virkar! Þetta er mest allt komið nema svona smá fiff. Ég held flestir geti tekið undir mína tilfinningu að smáatriðin eru það sem taka mestan tíma. Það að takkar komi rétt og flott út. Borði ef maður er með hann að hann virki og það rétt. Ég get nefnt sem dæmi þegar forritið tekur völdin af manni og ef maður er með ramma (frames) og tengill nái í skjal og setji það í rammann en ekki aðalgluggann. Ég er alltaf að seiva það rétt og breita og forritið bara nær í einhverja gamla útgáfu og...og...og...en þetta er að virka núna. Annað er ef maður er með ramma og það sem í honum er er lengra en vafraglugginn sem opinn er, þá hélt ég að skrun...eitthvað (scroll-bar) kæmi sjálfkrafa. En scroll- barinn vill ekki koma...sama hvað ég geri. Þetta er reyndar inn í ramma og það er alveg sama hvar og hvernig ég fer í properties það kemur ekki. Ég ætla að reyna áfram...en svona að mestu leiti er þetta komið og maður ætti sem sagt að geta skilað á réttum tíma. En átti maður ekki að skrifa í þessa dagbók þrisvar í viku...og ég sem er með blogger í lokaverkefninu...ætla að láta nemendur skrifa einu sinni í viku! En er það ekki til málsbóta að maður hefur miklu oftar en þrisvar í viku farið í og unnið í lokaverkefninu! :)

2003-05-16T01:01:00.000Z

Jæja, þá er búið að henda kennsluefninu á heimasíðuna. Þá er bara lokaverkefnið eftir! :)

2003-05-13T23:48:00.000Z

Ekki hefur mikill tími fundist til þess að sinna verkefnum síðan á föstudaginn. Ástæðan er að á föstudaginn var sýkta bólan sem hún Bára Örk fékk var bara ekkert að skána eftir vikulanga sýklameðferð. Ég fór með hana til læknis og hann kíkti á hana, sagði einfaldlega "andskotinn" og hringdi upp á nýja barnaspítalann og hún var lögð inn um kvöldið. Sýklalyf í æð, takk fyrir! Þrisvar á dag fékk hún dripp í æð og var ekkert voðalega ánægð með það. Hún fékk að vísu að fara heim og mæta í drippið en það var ekkert skárra fanst henni fyrir því! Það var síðan í morgun,þriðjudag, að hún losnaði við spelkuna og æðarlegginn. Hún og allir ofsalega ánægðir með það! Ekki allt búið enn. Þeir vilja halda áfram að drepa þessa sýkla. Já, já hún þarf að gleypa í sig eitthvað sýklalyf með skrítnu og löngu nafni 3 sinnum á dag, 8ml í senn! Já, 8ml. Það eru 24ml yfir sólahringinn. Það liggur við að við getum hætt að gefa henni að borða, þetta er svo mikið. Þessi 3 vikna hlaupabóla virðist því vera í rénum, vonandi eftir þessa 6 daga sem hún á að vera á sýklalyfinu. Eitthvað hefur maður þó náð að dútla í verkefnunum. Kennsluefnið er að verða ágætt (fullkomnunaráráttan að drepa mann) ætli ég fari ekki bara að hætta að hugsa um það og henda því á vefinn og einbeita mér að lokaverkefninu. Svo maður nái að klára það fyrir sumarnámskeiðin!

2003-05-09T14:44:00.000Z

Kennsluverfurinn er orðinn nokkuð góður. Maður á bara eftir smá fiff á honum og þá ætla ég að henda honum út á vefinn. Vonandi núna um helgina. Síðan er það lokaverkefnið. Því miðar hægt...en örugglega og sem betur fer í rétta átt. Það er rétt vika í 15 og það er spurning hvort að maður nær því fyrir þann tíma? Ég reyni! Aðalspurningin er kannski með morgundaginn og hvað maður eigi að gera? Ég er ekki að meina í kjörklefanum! Heldur um kvöldið! Þetta er ekkert gaman allar þessar spár og fyrstu tölur eiga að koma klukkan tíu um kvöldið. Og ég meina fyrstu tölur eru orðnar svo áreiðanlegar með öllum þessum tölvum og forritum að þær eru nokkuð nálægt endanlegri niðurstöðu! Þá er ekkert fútt í að horfa á Birgittu og írafár (maður neyðist hvort eð er til þess þann 24 :) Ég meina hvað á maður að gera á maður að leigja sér spólu eða reyna að fá pössun og kannski fara á eitthvað af kosningavökunum? Þetta er orðið meira mál heldur en að reyna að ákveða hvað maður á að kjósa! :)

2003-05-03T15:21:00.000Z

Jæja, eitthvað hefur maður verið í fríi undanfarið með þessa dagbók. Fyrst kom náttúrulega páskafríið. Og svo veikindafrí..hjá Báru Örk. Hún tók upp á því fyrir viku að fá hlaupabóluna og fékk hana annsi svæsna. 3 vökunætur í síðustu viku. Og hún fékk sýkingu í eina bóluna. Þannig að hún finnur ógurlega til og getur varla hreyft sig og það má varla koma við hana. Af náminu er það hins vegar að frétta að nám annara hefur verið í forsæti þegar færi hefur gefist...það er þessara sem ég kenni! Annars er það af mínum lærdómi að frétta að kennsluvefurinn er næstum tilbúinn og námskeiðsvefurinn sem við eigum að setja upp. Þar er slatti kominn niður á blað og ég held að ég sé kominn með útlitið. Fimmtándi maí nálgast samt óðfluga og...ég held að ég fari að horfa á Skrímsli hf enn og aftur með Báru :)

2003-04-16T21:46:00.000Z

Jæja, ég er löngu búinn að fá hugmynd að kennsluvefnum sem við eigum að setja upp. Meira að segja búinn að taka myndir og allt. Ég kem mér bara ekki almennilega að byrja. Sem sagt, það sem ég ætla að taka fyrir er hvernig á að gera skutlu. Hei, sagði einhver að þetta þyrfti að vera djúpt. Þetta á semsagt að vera ein mynd af hverju stigi með texta undir. áfram og til baka takka. Neðst á síðunni eiga síðan að vera tenglar (dropdown! fyrst að maður er búinn að læra það!) í síður með skrítnum og skemmtilegum skutlum. Það er nefnilega hellingur af þeim þarna úti á netinu. Alveg ótrúlegur hellingur. Meira um þetta seinna. Það er nefnilega svo merkilegt að núna ef maður sest við tölvuna fer maður bara að skanna. Ég tók að mér að skanna inn nefnlega heila dobíu af gömlum slides myndum fyrir mömmlu gömlu! Og einhvernvegin er það meira spennandi í augnablikinu! Skamm, skamm ætli maður verði ekki að fara að læra...eða eitthvað :)

2003-04-12T14:23:00.000Z

Annars er ég eins og fleiri til dæmis hann Eyþór (hérna er dagbókin hans Eyþórs ef við komumst ekki beint á kommentið) að átti mig á að það er lítið eftir og "nokkur" verkefni eftir. Maður er semsagt að reyna að finna upp tíma...já finna hann upp til þess að geta klárað öll verkefnin sem maður á eftir.

2003-04-12T14:17:00.000Z

Már Örlygsson var með fyrirlestur fyrir okkur í gær í fjarnáminu, hann talaði þar meðal annars um nýtt kerfi sem heldur utan um blogg og heitir Movable type. Salvör er soldið hrifin af því og maður sér að margir þeir sem eru með blogg eru greinilega hrifnir af því. En þá þarftu að setja það upp á heimasíðunni þinni/minni :) en getur ekki geymt það hjá þeim í Blogger í henni stóru Ameríku.

2003-04-12T13:59:00.000Z

Humm átti þetta ekki að vera blogg í sambandi við námið hjá manni? Eitthvað hefur þetta verið að breytast hjá manni upp á síðkastið! Ekki misskilja mig að maður hafi ekki verið á fullu í því. Þvert á móti. Núna er ég til dæmis í staðbundinni lotu upp í Kennó. Kristín Steins er hérna hliðina á mér og er að blogga líka...set tengingu í hana. Sorry Salvör við vorum líka að fylgjast með! :)

2003-04-08T15:33:00.000Z

Vá svakalega var ég heppinn í gær, maður lifandi ungir í samfylkingunni buðu á myndina Bowling for Columbine eftir hinn umdeilda óskarsverðlaunahöfund Michael Moore. Þessi Columbine er ekki um einhverja stelpu sem heitir Columbine, heldur um Columbine High Scool í bænum Littleton í Colorado. En þar réðust árið 1999 tveir nemendur inn og myrtu 12 samnemendur sína og einn kennara. Það hafa þó nokkrar minningarsíður verið settar á netið um þennan atburð. Um þennan atburð fjallar myndin meðal annars og tekur á óheftri byssueign Bandaríkjamanna. Það er til dæmis auðveldara fyrir ungling að kaupa byssu og skot í næstu búð, næstum því, hvorutveggja var hægt að kaupa í K-mart (Hagkaup í USA) heldur en bjór. Þeir eru strangari á skilríkjum við kaup á bjór heldur en byssum og skotum! Höfundurinn reynir að grafast fyrir um ástæður þess að það eru rúmlega 11.000 (ellefu þúsund) bandaríkjamenn myrtir árlega með skotvopnum en "bara" tæplega 400 (fjögur hundruð) í Þýskalandi sem kemur þó næst í röðinni. Ég mæli hiklaust með þessari mynd hún er alveg suddalega góð! Eins og gefur kannski að skilja fær Skotveiðisambandið í Bandaríkjunum NRA (National Rifle Association) ærlega á baukinn og kannski sérstaklega talsmaður og ímynd þess út á við. Hinn aldraði Móses...Charlton Heston (já, hann er enn lifandi!) Hún er þrusugóð og vekur mann til umhugsunar...veitir manni nokkurtíma af því!?

Svona rétt í lokinn, þessi hérna er algjör snilld...þið verðið að prófa hana! :)

2003-04-06T14:55:00.000Z

Það er greinilegt að kosningarnar eru að nálgast! Ég held að þetta sé að breytast í eitthvað pólitísk blogg hjá mér. Sem ég var að sötra morgunkaffið í gærmorgun (laugardaginn 5.apríl) og lesa Fréttablaðið. Já, ég tapaði orrystunni um hver fær að lesa Moggann á undan í gærmorgun. Þá urðu á vegi mínum auglýsingar frá stjórnmálaflokkunum. Ekki svosem í fyrsta skipti og örugglega ekki í síðasta skipti sem það verður. Mér hefur hins vegar alltaf fundist gaman að pæla í ímyndarhönnun, hvort sem er í auglýsingum eða í fjölmiðlum almennt. Þetta eru leifar frá því að ég var skiptinemi hjá svartri fjölskyldu í Bandaríkjunum og lærði fjölmiðlafræði í framhaldsskólanum (high school) þar úti og upplifði eina sandkassalegustu og skítkastlegustu forsetakosningar sem haldnar hafa verið þar (Bush(eldri) - Dukakis) árið 1988. Ég held að þessi áhugi minn hafi ekki minkað við að fara í bókmenntafræði í Háskólanum hérna heima og læra það sem heitir táknfræði. Það er orðið nauðsynlegt að kunna soldið í táknfræði til að geta lesið umhverfi sitt nú til dags! En svo ég haldi nú áfram með auglýsingarnar. Á blaðsíðu 9. Er auglýsing frá ungum frambjóðendum samfylkingarinnar. Þau ætla í herferð í kringum landið undir kjörorðunum "Lifandi um landið". Svo sem ekkert nýtt að stilla ungu frambjóðendunum fram. Ég fletti við blaðsíðunni og þar var auglýsing fráframsókn. Framsókn var að opna kosningamiðstöð í Suðvesturkjördæmi og í næstum heilsíðuauglýsingu var "ungu/fersklegu" frambjóðendunum stillt upp gegn "gömlu/reyndu" jálkunum, svona gróflega séð. Ekkert nýtt heldur svo sem við það að stilla frambjóðendum svona upp innan flokka. Ég fletti við og átti von á að rekast á auglýsingu frá vinstri-grænum eða sjálfstæðismönnum en viti menn þar var engin auglýsing frá neinum flokk. Ég fletti aftur við og þar var ekki heldur nein auglýsing. Ég hélt að maður væri sloppinn og ég var það alveg þangað til á blaðsíðu 39 (já fréttablaðið er farið að slaga hátt í moggan í blaðsíðufjölda stundum). Á blaðsíðu 39 er auglýsing frá frjálslyndum þeir taka mynd af frambjóðendunum fyrir framan grátt steinhús. Gæti verið ráðhúsið, gæti verið alþingishúsið eða gæti verið jafnvel þarna niðri í Austurstræti þar sem sumir af rónunum hópast saman rétt hjá 10/11. Þeir ætla greinilega að skapa sér ákveðna sérstöðu vegna þess að á myndinni eru tveir hundar með frambjóðendunum. Mér datt nú í hug strax einhverjar uppstrílaðar myndir af götugengjum í New York. Gott ef ég hef ekki séð svipaða mynd af Erpi og félögum í Rottweilerhundum? Ég hlakka til að sjá hvort við erum að sjá nýtt "trend" í auglýsingum stjórnmálaflokka! :)

2003-04-04T22:13:00.000Z

Nú er að styttast í kosningarnar...það þýðir að fólk þarf að fara að gera upp hug sinn og vanda vel valið! Muna síðan að kjósa rétt. Þetta próf hjá ungum vinstri grænum er pjúra snilld...eða svona næstum því :)! Hérna getur þú athugað hvaða stjórnmálaleiðtogi þú ert. Ég ætla ekki að segja ykkur hvaða stjórnmálaleiðtogi ég var, nema hann er hálfsköllóttur, rauðhærður og bara alltaf í púlti í þinginu. Ef þið eruð virkilega heitir vinstri grænir getið þið athugað hverjum frambjóðanda skoðanir ykkar líkjast mest.

2003-03-31T22:29:00.000Z

Henti loksins vefleiðangrinum inn. Tók einn gamlann sem ég á...er reyndar samvinnuverkefni mín og konunnar minnar eins og fram kemur á aðalsíðunni. Þó hann sé ekki alveg nýr þá er hann ennþá notaður í kennslu hjá mér og stendur fyrir sínu...þó svo að tenglarnir heiti ekki alveg það sama og kannski í "venjulegum" vefleiðöngrum...það er til dæmis ekkert sem heitir "Bjargir" sorry þeir sem eru vanafastir og vilja hafa það :( En þetta er minn vefleiðangur :) Nú er bara að fara að undirbúa sig fyrir staðbundnu lotuna...powerpointið og það allt.

2003-03-27T21:27:00.000Z

Jæja, aðeins á eftir áætlun en ég kóðaði og sendi inn "mína" fjóra krakka í rannsóknina hennar Sólveigar. Þá er Láru þáttur búinn...eða svona næstum. Því maður á víst að bregðast við innsendingum frá einhverjum öðrum og senda inn hugleiðingu um rannsókn sína.

2003-03-23T22:07:00.000Z

Ekki mikið að frétta svosem ... nema að ég druslaðist til þess að sparka auglýsingaborðanum út af blogginu.

Smá hugleiðing. Við vorum að velta því fyrir okkur í morgun yfir morgunsjónvarpinu við hjónin þetta með öll dýrin í barnaþáttunum sem eru látin fá mannlega eiginleika. Ég meina eins og í morgun með skjaldbökuna sem var með heimæði og borðaði kjúklingasúpu af því hann var með kvef. Það er eitthvað voða "stjúpid" við þetta allt. Kannski á þetta að vera voða krúttlegt og maður fattar það bara ekki. Svo eru allar ofurhetjurnar með eiginleika dýra...spiderman sem labbar upp veggi eins og könguló, svo man ég eftir einhverjum fleiri eins og aquaman sem er bókstaflega með hreistur og og tálkn. Það er eitthvað við þetta. Kannski að maður leggist í pælingar og skrifi lærða ritgerð um þetta? :) hehehehheeh

Svo verð ég náttúrulega að tengja í síðuna hennar Unnar Maríu Bergsveinsdóttursem eins og alþjóð veit eftir að hafa lesið greinina um bloggið í Mogganum í dag er veik fyrir tekki. Hún fór fór á húsgagnagóðahirðissukk með honum Bjarna sínum í sumar...en hún Ásta mín er einmitt aðstoðarverslunarstjóri í Góða hirðinum

2003-03-16T22:33:00.000Z

Verkefni 2 fyrir Láru Stefánsdóttur er komið á skilasíðuna á heimasíðunni minni.

Hér er líka tenging beint í VERKEFNI TVÖ FYRIR LÁRU

2003-03-16T19:36:00.000Z

NÚ ER KOMIÐ VOR!!! Eða þannig :) Og hvað er gert á vorin og sumrin...nema að grilla. Það var semsagt farið út á pallinn í kvöld og kvenleggur fjölskyldunnar settist við grillið og færði dýrindis pulsur inn í kvöldmatinn. Karlinn stóðst ekki mátið og varð að ná þessu á mynd. Ef að myndin kemur ekki þá er hún líka...hérna

2003-03-14T21:42:00.000Z

Einhvertíman hefði þetta þótt frétt til næsta bæjar...hérna situr maður á föstudagskvöldi og þykist vera að reyna. Einhvernvegin er ég í svipuðum sporum með þetta verkefni númer tvö fyrir Láru og sumir nemenda minna í heimasíðugerð. Þegar þeir sitja fyrir framan skjáinn...næstum tómann og segja. Hey Gunni...hvað á ég að setja á þessa síðu??? Og þá segir maður þeim oft að leggja höfuðið í bleyti og átta sig á því hvað þeir ætla að hafa á síðunni og um hvað hún á að vera. Já, já maður fær þetta allt í hausinn og kom vel á vondann og það allt, ég veit, ég veit! :)

2003-03-12T22:25:00.000Z

Þessi færsla í dagbókina verður að skoðast sem lausn á verkefni 1 í námslotunnu sem Lára Stefánsdóttir sér um hjá okkur í Nám og kennsla á netinu!

UT 2003...hvað fannst mér(meðal annars)? Mér fannst eins og svo mörgum öðrum mest varið í fyrirlestur Guðrúnar Þengilsdóttur, sem var einn af aðalfyrirlesurum ráðstefnunnar undir kjörorðinu REYNSLA þar sem hún lýsti kostum og göllum fartölvuvæðingunnar. Mjög raunsönn mynd sem hún dró upp og algjörlega án þess að fegra hana en hún var heldur ekki að mála skrattann á vegginn. Hún gat kannski gefið svona raunsæja mynd af þessu fartölvuverkefni vegna þess að hún stóð ekki að því og hafði engra hagsmuna að gæta. Þess vegna þurfti hún ekki að vera að fegra myndina.

Síðan ætlaði ég að komast á málstofa Frosta Heimissonar um Námsefni á netið en hún var full. Það er reyndar eitt sem mér finnst að mætti athuga að þegar málstofur fyllast fljótt eins og gerðist með sumar hvort að ekki mætti endurtaka þær eins hvort ekki mætti stytta öll innlegg, fyrirlestra og málstofur og endurtaka þau. Það er alveg óþolandi þegar að maður er á svona stuttri ráðstefnu eins og þessari og þarf að velja á milli stundum 5 eða 6 atriða sem eru á sama tíma. En verður svo að sleppa öllum vegna þess að málstofur eru “fullar” eða fyrirlestrar byrjaðir!

Mig langaði að kíkja á fyrirlestur Ármanns Halldórssonar um netlist fyrir kennara en hann var byrjaður þegar að ég loksins fann stofuna, þannig að ég ákvað að nota þennan tíma til að rölta á milli sýnisstofanna. Því var það að ég rambaði á eina sýnistofu sem ég heillaðist alveg af og var óspar á að benda fólki á ráðstefnunni að kíkja og langar að fjalla aðeins um hér sem annað af tveimur atriðum sem ég vil fjalla sérstaklega um á UT2003. Það var sýnistofu sem listnámsbraut VMA sá um og fjallaði um tölvunotkun í myndlistar- og hönnunarkennslu. Það að ég skuli velja þessa sýnisstofu til að fjalla um hefur ekkert með það að gera að móðurbróðir minn skuli sjá um listnámsbrautina í VMA! Ég hefði líka getað tekið fyrir sýnisstofu sem Arnar Yngvason frá leikskólanum Iðavöllum var með og hét “Tölvur og vísindaiðkun barna”. Þar sem hann var að sýna notkun þeirra á tölvusmásjá og hljóðhermi frá Intelplay og á mjög einfaldan en frábæran hátt. Ég fattaði bara ekki fyrr en ég fór út úr sýnistofunni hjá VMA að þetta var þeirra sýnisstofa og þá var ég hvort eð er dolfallinn! Það sem þau voru að gera var að sýna hvernig þau voru til dæmis að nota stafrænar videóvélar til að taka myndir af krökkum þegar þau mynduðu uppbyggingu snjókorna þegar þemað var vetur eða hvernig þau tóku myndir af snjó og tóku inn í önnur forrit eins og powerpoint og þau bjuggu til texta, örsögur eða ljóð. Ég sem bókmenntafræðingur var mjög hrifinn af þessu og þess vegna segi ég líka örsögur EÐA ljóð. Mér finnst ekki vera svo mikill munur oft á tíðum á milli þessara forma. Og stundum vildi ég að skiptingin á milli þeirra væri ekki til vegna þess að mér finst hún hamla oft þegar verið er að fjalla um texta sem svo sem gæti fallið undir hvora skilgreininguna sem er. Þau sýndu líka hvernig þau notuð stafrænar myndavélar til þess að taka myndir upp og taka inn í sig aftur þannig að þær bjuggu til eins konar ekkó eða bergmál. Þetta mynti á þessa fyrstu og frumstæðustu effekta í myndböndunum í gamla daga eins og Bohemian Rapshody með Queen. Mér fannst líka flott það sem þau voru að sýna þar sem myndavélinni var stillt upp og beint að einstaklingi sem sat í stól. Myndinni var síðan varpað með skjávarpa upp á vegg og þá sá viðkomandi sjálfan sig og átti að teikna sjálfsmynd á gler/plexiplötu. Þetta var mjög sniðugt og er eins og þær sögðu þarna sem voru þegar ég kíkti við til þess fallið að þjálfa hægra heilakvelið. Ég verða að viðurkenna að mér fannst þetta allt brillíant. En ég sá einn hæng á þessu. Það eru tækin sem myndu hamla þessu. Stafrænar videóvélar eru ekki í öllum skólum hvað þá skjávarpar. Ég veit að þetta er svo sem bara nöldur yfir smáatriðum. En ég verð að játa það að það sem ég hreyfst mest af hjá listnámsbraut VMA var það sem var einfaldast. Þar sem þau notuðu myndvarpa. Settu litað vatn í form og frystu. Settu síðan ofan á myndvarpann og vörpuðu upp á vegg. Síðan var maskínupappír settur á vegginn og krakkarnir gátu málað...ekki eftir litunum og formunum sem komu upp á vegginn heldur út frá þeim. Þau voru semsagt að skapa út frá einhverju öðru. Það sem eru auðvitað svo skemmtilegt með þetta er að vegna hitans þá bráðnar frostklumpurinn og við þau breytast bæði áferðin og lögunin á “litunum” sem varpast á vegginn og eins þau ljósbrot sem myndast við ljósið í myndvarpanum og vatninu frostnu eða misþíðu. Eins notuðu þau myndvarpa og settu heklaðar dúllur og bróderingar sem ég kann ekki að nefna og vörpuðu upp á vegg. Það var hægt að nota það í leikræna tjáningu einn nemandi við myndvarpann og hreyfir blúndurnar og annar nemandi upp við vegg og á að bregðast við eða leika sér með þær hreyfingar sem koma á blúndurnar (munstrin) á veggnum. Þarna reynir á samspil og samvinnu nemenda. Einhvernvegin var það að ég heillaðist af þessu “einfalda” hjá þeim og er þegar byrjaður að þróa eigin verkefni út frá þessu með yngstu nemendum mínum.

“Hitt” sem mig langar að fjalla um var á laugardeginum og var fyrirlestur Þórs Jóhannssonar (Lóa). Sem hér “Farsæl þróun UT skóla- hvað þarf til ?” Ég varð mjög hrifinn í upphafi á fyrirlestrinum þegar hann dreifði blaði þar sem á stóð að upplýsingalæsi væri kjarni upplýsingamenntar og grundvöllur allrar markvissrar tölvunotkunnar. Það er að nemendur þjálfuðust í því heildstæða ferli að átta sig á vandamálinu. Spyrja sig viðeigandi spurninga, leggja á ráðin um laust viðfangsefni, leita uppi og þjálfast í notkun mismunandi upplýsingaveitna, vega og meta upplýsingar (sigta úr það sem þau þurfa) og koma því frá sér á viðeigandi hátt sem hæfir viðfangsefninu og skýra frá niðurstöðum sínum. Þetta ferli hef ég reynt að leggja áherslu á í kennslu minni, undir kannski einfaldari mynd af þessu...og þó og kjörorðunum Afla - Vega og meta – Miðla.
Það sem mér fannst gaman og áhugavert að heyra að í þeim tveim skólum sem hann starfar sem kennsluráðgjafi í upplýsingatækni (ég held hann sé titlaður það, ég reyndi að finna titill á hann á heimasíðum skólana en það gekk ekkert!), Grunnskólann í Borgarnesi og Varmalandsskóla. Þá er það á ábyrgð allra kennara að þjálfa nemendur í upplýsingalæsi eða eins og hann Lói orðaði það. Það bera allir kennarar ábyrgð á uppeldi og fræðslu í UT.. Það er sem sagt ekki til neitt sér fag sem heitir upplýsingamennt og hefur að geyma aðalkjarnann upplýsingalæsi. Heldur fléttast það inn í allar greinar. Þessu er ég bæði sammála og ósammala að geti gengið upp. Þetta er auðvitað dæmi um tölvustutt samvinnunám sem allt gengur út á hjá Lóa og þeim skólum sem hann kennir við. Sjá betur umfjöllun hans um um tölvustutt samvinnunám.
Ég er þeirrar skoðunnar að kenna verði markvisst á tölvur og hin ýmsu forrit, já og meira en það til dæmis fingrasetningu og ýmis grunnatriði önnur eins og uppbyggingu stýrikerfi. Einnig mætti nefna hinu ýmsu þætti tölva og ekki hvað síst siðfræði í efri bekkjum grunnskóla. Það sé ekki hægt að svippa þessu fagi út einn tveir og þrír. Hins vegar finnst mér þetta góð framtíðarsýn að kennarar verði það þjálfaðir í upplýsingatækni að þeir geti fléttað henni inn í greinar eða kennslu sína. Samþætting við aðrar námsgreinar er nú líka það sem skiptir máli í verkefnavinnu í upplýsingamennt. Ég get nefnt sem dæmi um publisher þar sem við vorum að kynna 6 bekkingum það forrit og þau áttu að búa til þríbrotin bækling og við fórum í samvinnu við íslenskukennara og þau áttu að búa til bækling um Jónas Hallgrímsson, kynna hann og eitt ljóða hans og umfjöllun sína um það. Þetta gilti hjá þessum nemendum sem eitt verkefni. En ég var búinn að kenna þeim á Publisher áður. Þannig að þau kunnu eitthvað á forritið og svo notaði ég þetta raunverulega verkefni. Hugsmíðahyggjan leggur nefnilega einmitt áherslu á raunveruleg verkefni. Og Lói leggur áherslu á að hugsmíðahyggjulegar kennsluaðferðir gildi í kennslu í upplýsingamennt. Þar er ég sammála honum um að kennslufræðin verði að vera byggð á kenningum hugsmýðahyggju. Mér finnst hinns vegar að þetta sé skemmtileg og vonandi raunsæ utópía að þetta geti gengið eftir að allir kennarar kenni upplýsingalæsi. En til þess að það geti gerst þurfa allir kennarar að vera vel að sér í upplýsingamennt og þáttum hennar og mjög samstilltir og frjóir í hugsun. Það eru kennarar því miður ekki upp til hópa í dag. Hvorki vel að sér í upplýsingatækni né frjóir í hugsun! :) (þetta er auðvitað sagt með íróníu í huga og í hálfkæringi...og þó) Þess vegna getur maður auðveldlega séð fyrir sér að svona fyrirkomulag myndi detta um sjálft sig og einungis fáir kennarar nota þetta markvisst. Sérstaklega ef þetta er eins og hann lýsti að kennara panta sér tíma í tölvuveri og sjá um kennsluna með aðstoð kennsluráðgjafa. Spurningin er...er þetta farsæl þróun í UT?
Læt þetta vera nóg blaður um tvennt af því sem sótti á UT2003.

2003-03-09T22:42:00.000Z

Núna breytist bloggið mitt í einskonar "Játningar Antóníusar" hér skrifar nefnilega iðrunarfullur syndari. Hvar eru litlu broskallarnir þegar maður þarf þeirra við. Ætli það kæmi ekki mad eða bowling hérna. Þeir skilja þetta sem það skilja :) Nei mig vantar kannski broskallana til að koma íróníunni fyllilega til skila! Ég hef nefnilega smá samviskubit er búinn að vera í vetrarfríi og samt lítið nennt að gera! Lítið skrifað hér inn eða unnið í heimasíðunni. Og það átti að klára vefleiðangurinn og henda honum inn á heimasíðuna. Setja fullt af myndum og finna stílsíðu á heimasíðuna búa til hnappa og...og...og...já og taka auglýsinguna út héðan...humm er eitthvað búið af þessu? Nei, en ég er eiginlega orðinn þreyttur af allri þessari upptalningu. Jámm og svo ætlaði ég að athuga ADSL tilboðið hjá símanum! Ásta er í tölvunni hjá Silju að vinna verkefni í Studio Max, ég hérna og Sjónvarpið malar einhverstaðar hérna líka! Sunnudagskvöld hjá...:) Jæja, kannski maður fari að hita sér te og lesa svona til tilbreytingar og gera sig klárann í vinnuvikuna. Ég lofa að ég ætla (að reyna) að vera duglegri í henni en ég var í þessari viku! :)

2003-03-02T23:15:00.000Z

Jæja, núna er maður bara alveg eins og jólasveinarnir, kominn aftur til byggða og tekinn til við að mellta á UT2003. Lítið að frétta nema að bíllinn er fundinn, sem eru svosem hálfvegis góðar fréttir vegna þess að það voru stolin númer sett á hann og okkar þar með ekki lengur á honum og við megum ekki nota hann!!! Þurfum eitthvað að fara að garfa í því á morgun!

2003-02-27T22:21:00.000Z

Mikið búið að vera að gera undanfarið...svona fyrir utan veikindi og svoleiðisplott! Var með námskeið fyrir kennarana í Snæló í Publisher. Nú svo er það auðvitað UT2003 á morgun alveg eldsnemma. Það er reyndar æðislegt að ég ætlaði ekki að keyra norður...af því bílnum mínum var stolið í nótt! Þannig að ef einhver hefur séð Subaru Legacy árgerð ´90 svona beige (reyndar er mér sagt að karlmenn segja ekki beige heldur ljósbrúnn!!! Þetta er semsagt ljósbrúnn Legacy og lýtur út fyrir að vera 13 ára! Númerið á honum er YA-740 ef þið sjáið hann eða verðið vör við hann einhverstaðar hafið þá samband við Lögregluna eða þið getið líka hringt í mig 690-3904 eða 552-5319

2003-02-23T00:39:00.000Z

Mig langar svo í ADSL. hvar er ódýrast að fá sér svoleiðis! Ég er reyndar að tékka á því núna! Mundi þá að maður á að vera að hugsa eitthvað um vefleiðangra eitthvað núna. Hef svo sem ekki miklar áhyggjur af því verkefni...vegna þess að ég á nokkra tilbúna sem ég hef prufukeyrt og notað í kennslu. Einn til dæmis rosalega flottan um Írland og ferð þangað! og ýmsar útgáfur af honum. En mig langar að búa til nýjan fyrir þetta verkefni. Humm tja....decisions, decisions, decisions!!!

2003-02-23T00:05:00.000Z

Humm bæði mikið og lítið að frétta af þessum vígstöðvum. Ég er búinn að vera heima við í síðustu viku. Enda litla prinsessan búin að vera veik. Var heima miðvikudag, fimmtudag og föstudag. Varð að fara út á föstudaginn. Heimtaði að fá að fara í búðir að kaupa inn!!! :) Það er aldrei eins gaman að komast að gera innkaupinn eins og þegar svona stendur á! Maður bara verður að komast út! Fór í bíó í gærkvöldi fór að sjá bestu hrollvekju sem ég hef séð lengi. Ég hef ekki fengið svona mikla gæsahúð og bara síðan að maður sá Carrie eða Shining í gamla daga eða seven um árið. Myndin sem ég fór að sjá er hringurinn ef þið hafið gaman að góðum spennumyndum þá mæli ég hiklaust með þessari! Fór síðan í dag í boð sem litli bróðir minn var með þar sem hann var að útskifast með B.S. í Stærðfræði. Fann ekkert um útskriftina á netinu ennþá þannig að ég vísa ykkur á heimasíðuna hans litla bróður míns Nú og síðan er náttúrulega konudagurinn á morgun! Og þá halda náttúrulega allir að komið sé að hinni árlegu blómabúðaferð! Yeah right!!! Ætli það verði bara ekki pöntuð pizza og maður vaski upp svona í tilefni dagsins. Eða eins og Óli Palli á rás2 sagði: "Ætli maður reyni ekki að vera minna leiðinlegur en vanalega í tilefni dagsins!" Eða kannski maður ætti ekki að taka sér menn til eftirbreytni sem þetta hér spyrst út um? Jæja, eníveis! Þið konur þarna úti til hamingju með daginn og karlar veriði góðir við konurnar í lífinu ykkar! Ég ætla að enda á spakmæli sem stendur á postulínskökukefli hjá nafna mínu og afa í Hrafnhólum. Konan þín er mjög gáfuð, ef þú efast einhvertíman um það...minnstu þá hverjum hún giftist!

2003-02-20T22:20:00.000Z

Jæja, núna fékk ég loksins viðbragðaskjóðuna (backlog) til að virka. Ég þurfti að senda póst út til þess sem sér um backloggið og hann eyddi bara skráningu minni sem virkaði ekki. Ég skráði mig þá bara aftur og þá svínvirkaði þetta. Síðan er ég búinn að vera að eyða "smá" tíma til að íslenska þetta allt saman og fá þetta eins og ég vill. Ótrúlegt hvað fer mikill tími í þetta smá java dót og dútl! Það góða við þetta allt saman er að ég er búinn að endurhlaða síðunni nokkrum sinnum og hífa teljarann upp um leið! hehehehhehe nú vantar mann broskall :) En ég ætla að bregðast við þessum skrifum mínum til að sjá hvort þetta virkar ekki hjá mér. Annars er maður bara farinn að hlakka til UT2003 um næstu helgi.

2003-02-16T14:50:00.000Z

Íslensku stafirnir virka ekki hjá mér frekar en öðrum en teljarinn virkar!

2003-02-16T14:20:00.000Z

Jæja, ég ætla ekki að nöldra núna. Nema yfir sjálfum mér þá kannski helst! Búinn að vera eitthvað svo latur að setja inn eitthvað hérna upp á síðkastið. Fór niður í ráðhús í gær og kíkti á sýninguna nýbreytni í skólastarfi. Hitti Þórunni þar. Annars finnst mér eins og svo mörgum, held ég, að maður sé soldið einn hérna ekkert webboard, eða webct eða neinn svona allsherjar völlur þar sem allir hittast og geta tekið þátt í umræðum eða setja á sameiginlegan stað verkefni. Þetta er svoldið sona samblanda af "narsisimsa", maður er svona að tjá sig um sig og sínar aðstæður, nöldur, áhyggjur, vandamál eða hvað eina en maður er bara að tjá sig við sjálfan sig! og erfitt að fá eitthvað feedback á þettta Og í bland við það er einhver don Kíkóta fílíngur. Maður er einn að berjast við vindmyllur, sumar fellir maður og aðrar fella mann! Þess vegna finnst mér að þessar skilaboðaskjóður séu alveg frábærar!

2003-02-11T22:48:00.000Z

Mér finnst eitt skrýtið, kennarar eru að fá umfjöllun fyrir það að fara eftir námsskrá! Þeir sem sáu fréttirnar á ríkissjónvarpinu í kvöld tóku kannski eftir því að það var fjallað tölvukennslu í Smárskóla. Ég ætla strax að slá varnaglann rækilega í gegnum tréverkið! Þetta er ekki skrifað og þessir þankar vöknuðu ekki vegna afbrýðissemi í garð Geirs Sverrissonar eða Smáraskóla vegna þess að þeir hafi fengið umfjöllun. Þessir þankar vöknuðu vegna þess að verið var að fjalla um skóla sem eru að gera það sem þeir eigu að gera! Ég er að gera nákvæmlega það sama og Geir í mínum skóla, meira eða minna. Við tveir ásamt tölvukennurum í Kópavogi höfum unnið að gerð og samningu "einskonar samræmdri" kennslustefnu í upplýsingamennt í Kópavogi. Ég held að flestir skólar í Kópavogi (ég ætla ekki að fullyrða um hvernig þetta er annarstaðar, en ég held og veit að allur gangur er á því) sé byrjað að kenna upplýsingamennt strax í fyrsta bekk. Athugið bara aðalnámsskrána frá 1999. Vegna samræmdu kennslustefnunnar eru áhersluatriðin svipuð í öllum Kópavogi, þó mismunur sé á milli skóla og kennara náttúrulega! Það sem ég er að velta fyrir mér í sambandi við þennan fréttaflutning er hvort að þó að ákveðinn hópur kennara álíti að kennsla í upplýsingamennt (og kannski ákveðin kennsla í eins og fingrasetningu sem grunni) sé eitt af þeim grundvallaratriðum sem nemendur verði að tileinka sér nútildags. Og þessir sömu kennarar álíti að þeir (nemendur) verði að byrja að læra þetta fag frá helst fyrsta degi skólans eins og lestur og skrift líkt og Geir sagði í fréttunum, getur þá verið að það þyki merkilegt að einhverjir skólar séu kenna upplýsingamennt alveg frá fyrsta bekk!? Getur það einmitt verið að það þyki merkilegt vegna þes að þetta er ekki það sem skólar eru að gera almennt? Af því að ég er ekki ennþá búinn að setja upp bakklogg þá langar mig að biðja ykkur (ef þið hafið einhverja skoðun á þessu máli!) að fara á heimasíðuna mína og setja inn skilaboð í skilaboðaskóðuna (spjallborðið) eða senda mér póst

2003-02-09T13:19:00.000Z

Í morgun rétt fyrir átta kom sms. Það hljómaði svona: "Pattaralegur drengur leit dagsins ljós kl 6.15". Pattaralegi drengurinn var annars 15 merkur og 52 og hálfur cm. Annars er planið í dag svona fyrir utan að undirbúa kennslu að skanna inn fleiri myndir fyrir heimasíðuna og kannski að fara að koma þeim inn. Setja meiri texta á eitthvað af þessum undirsíðum. Síðan ætla ég að prófa mig áfram hvar spjallborðið kemur flottast út á síðunni.

2003-02-09T00:39:00.000Z

Var að klára að setja inn spjallborð á heimasíðuna mína. Það er annars helst í fréttum að mamma var að hringja og systir mín er komin upp á fæðingardeild. Hún á von á sínum þriðja strák...eða fyrstu stelpu! Hugsanlega meiri fréttir af henni á morgun. Varðandi spjallborðið, mér finnst ég vera eins og krakki í nammibúð. Það var einhver búinn að segja þetta áður á spjallborðinu þínu Salvör var það ekki? Ég er allavega búinn að sýna krökkunum sem ég er að kenna heimasíðugerð þetta og ég held að allir séu komnir með þetta á heimasíðurnar sínar.

2003-02-08T15:18:00.000Z

Líkt og öll þjóðin, eða allavega margir, þá horfði ég á þáttinn um Michael Jackson um daginn. Ég verð nú að segja að ég er sömu skoðunnar um hann og nafni minn hann dr. Gunni og það sem hann skrifaði 7.feb um þennan þátt. Sorglegt er eiginlega það eina sem manni datt í hug eftir að hafa séð þennan þátt. Talandi um tengingar. Þá átti dr. Gunni heima á Álfhólsvegi í gamla daga og amma mín og afi áttu heima í sömu raðhúsalengu og hann. Og það sem mér fannst rosalega gaman var að fara þegar við vorum í heimsókn hjá ömmu og afa var að fara út að skúrnum þar sem Gunni og félagar í SH draumi voru að æfa sig og hlusta síðan á ógeðslega skemmtilega og ókeypis tónleika. Já, maður var kominn með þroskaðann tónlistarsmekk snemma!

2003-02-08T15:07:00.000Z

Hef lítið svo sem verið að gera í heimasíðunni í vikunni, fyrir utan teljarann. er að hugsa um að setja teljara á bloggið líka. Ef það er hægt. En ætla fyrst að leika mér eitthvað meira í stillingunum hérna og reyna að finna eitthvað flott útlit sem mér hugnast. Ætla þó að vinna eitthvað í heimasíðunni í dag og morgun. Hef þó í samræmi við fyrirmæli vikunnar verið að vinna myndir fyrir vefinn. Ætla þó ekki að setja þær á síðuna fyrr en ég er kominn með slatta. Læt vita þegar það verður! :) Líkt og allir aðrir Íslendingar sótti ég um aðgang að Íslendingabók og er búinn að vera að kíka eitthvað á hana. Þá datt mér í hug að gaman gæti verið að tengja mig við aðra nemendur í hópnum. Er kominn með ýmsar tengingar ætla þó ekki að setja það hingað á bloggið eða heimasíðuna fyrr en ég er kominn lengra með það. Bara svo allir haldi ekki að ég sé algjörlega aðgerðalaus! :) Var reyndar að ganga frá gistingu á Akureyri á UT og ætla með rútunni, norður. Þannig að það ætti allt að vera klappað og klárt. Nema einhver vilji taka með sér hrikalega skemmtilegan ferðafélaga og bensínkostnaðardeilara norður...og helst suður aftur!

2003-02-05T15:22:00.000Z

Fékk mér teljara hjá teljari.is á heimasíðuna og hann virkar. Nú er bara að sjá hvort maður kemst í þetta 10.000 (lesist tíu þúsund heimsókna) mark svo maður getir farið að taka þátt í samræmdu vefmælingunni. Humm ætli það verði víst ekki seint. Maður verður ekki feitur í heimsóknum talið að vera að fjalla um eitthvað sem tengist kennslu (jafnvel þó það tengist tölvum)! Ætli maður yrði ekki frekar að vera með myndavélina á lofti, alltaf á djamminu og halda úti heimasíðu þar sem þetta allt sameinast ef maður væri að spá í að höfða til sem flestra. Núna hljóma ég eins og gamall stærðfræðikennari sem minnir á stærðfræðireglu sem gildir svo víða í mannlífinu. Það er lægsti samnefnarinn sem gildir...það er lægsti samnefnarinn sem gildir! Nóg nöldur í dag! Er reyndar að spá í að búa til nýtt blogg, nöldurhornið, svo maður upptaki ekki "allt plássið" hérna! heheheheh

2003-02-02T22:16:00.000Z

Jæja, núna er handboltinn búinn. Núna getur maður farið að snúa sér að einhverju öðru eins og að undirbúa kennslu eða eitthvað svoleiðis! :) hehehehhehe. Eða eitthvað! Ég var að fikta í settings á síðunni setja inn einvhverja linka og svoleiðis. Ég breytti líka um útlit á síðunni á föstudaginn. Núna er ég búinn að smita eiginkonuna af blogginu. Hún er komin með blogg líka. Hún tók þó loforð af mér að setja ekki inn tengingu fyrr en hún væri viss um að hún myndi skrifa reglulega í það. Og að sjálfsögðu stend ég við það. Í raun og veru sagði hún að ég mætti ekki gefa upp slóðina hennar fyrr en ég næði að tengja í myndirnar mínar. Sem mér sýnist þá verða aldrei! heheheheh einmitt! Ég skal koma þessum myndum til að virka. Ég er að gera allt rétt en það er samt eitthvað. Þetta er eins og ég heyri oft í kennslunni og örugglega þið mörg. Ég er að gera þetta allt rétt..það er bara eitthvað sem er ekki að virka! By the way...ég hélt með Króötunum í dag!!! :) Svo er eldri dóttirin Silja, mjög svag fyrrir þessu bloggi líka. Ég hef eiginlega lofað að þegar hægist um hjá henni að koma henni í samband og kenna henni á þetta. Þannig að kannski verð ég með tvær tengingar í önnur blogg á næstunni!. Ég er samt eiginlega að leita núna að póstfangi hjá einum kennara í skóla hérna í borg til að skammast! Það eru foreldraviðtöl á morgun hjá eldri stelpunni og við erum óánægð með tölvukennsluna. Hún er í fimmta bekk og það eina sem þau eru að fá er ritþjálfi! Ég meina ég er að kenna öðrum bekk meira en það!!! Ég ætla ekki að nefna nafnið á skólanum en þið vitið að við búum í Þingholtunum! Hvaða skóli er þar næstur! Kannski er ég bara reiða foreldrið sem vill að því sé kennt það sem því finnst skemmtilegast. En það er málið...mér finnst skemmtilegast að liggja í góðum hægindastól með kaffi og góða bók og ekki gera neitt annað! Þannig að...! Mér finnst allavegarétt að láta í mér heyra...þetta skiptir máli að krakkarnir okkar séu að fá góða menntun sem nýtist þeim... ekki bara að geta farið í sky-roads leikinn eða prentað út af Barbie.com eða Disney.com...það getum við kennt þeim heima!!! Jæja, nóg í bili ...þetta er "vitlaust" fólk sem ég er að taka reiði mína út á!

2003-01-31T16:43:00.000Z

Ég er búinn að vera að skrifa á bloggið nokkuð reglulega. Heimasíðan er komin upp og virkar! Búinn með tæknilýsinguna og vefrallýið. Ég setti bara tengingu beint á vefrallýið því að ég á svo sem nóg af þeim. Nota þau nokkuð reglulega í kennslunni. Hei (nei, gras!), ég er að átta mig á því að ég er búinn með öll verkefnin og 1. febrúar ekki einu sinni kominn! Þetta er mjög óvenjuleg staða hjá manni! Ég verð að segja það. Einhvernvegin er maður vanari að vera á síðustu mínútunum með þetta!

2003-01-31T15:59:00.000Z

Vefrallýið er komið á heimasíðuna mína. Verkefnin bæði tæknilýsingin og vefrallýið er á síðunni framhaldsnám. Hérna er tenging í vefrallýið. Síðan er hérna tenging í tæknilýsinguna líka á heimasíðunni minni.

Ég gleymdi víst að setja inn smá kynningu á sjálfum mér hérna á bloggið. Ég er semsagt rétt um þrítugt. Fæddur 1970 í Reykjavík, fluttist í Kópavoginn og ólst þar upp. Gekk í Snælandsskóla í Kópavogi. Um tvítugt flutti ég í Reykjavíkina aftur en hef síðan 1997 verið að kenna í Snæló. Kominn aftur heim í heiðardalinn! Byrjaði í hálfu starfi sem leiðbeinandi á tölvur og stuðningsfulltrúi. Ári seinna minnkaði stuðningsfulltrúinn leiðbeinandinn jókst. Þangað til hann var full staða og vel það. Nú er leiðbeinandinn hættur en kennarinn tekinn yfir...síðan í vor þegar ég fékk kennsluréttindin.

Ég er giftur...nei, nei ég er kvæntur Ástu Þórisdóttur, á eina fósturdóttur Silju Ingólfsdóttur (10 ára) og dótturina Báru Örk (1 1/2 árs). Læt þetta nægja í bili, kannski kemur eitthvað meira síðar :)

2003-01-30T15:47:00.000Z

Eitthvað eru myndirnar að stríða mér. Ég sé þær ekki ennþá. Veit ekki með aðra. Ég bjó þess vegna til undirsíðu á vefnum mínum með bloggmyndum Þið ættuð að sjá myndirnar þar.

2003-01-30T15:28:00.000Z

Hérna kemur svo smá pistill þar sem lýst er aðstæðum og tækni sem maður býr við núna. Þetta má skoðast sem uppkast og seinna verður komin fullunnin útgáfa á heimasíðuna.

TÆKNIN SEM ÉG BÝ VIÐ NÚNA ÁSAMT SMÁVEGIS FORTÍÐAR- OG FRAMTÍÐARSÝN.

Hvar er ég staddur núna? Það er ekki gott að segja. Kannski er best að átta sig á því með því að líta örlítið til baka. Skoða hlutina úr ákveðinni fjarlægð. Skoða nútíðina úr fortíðinni. Ég fór á fyrsta tölvunámskeiðið árið 1982. Já, ég var bara tólf ára, þannig að þetta er ekki prentvilla. Þetta var fyrsta námskeiðið sem Nýi Tölvuskólinn hélt og var í LOGO. Ég man hvað mér fannst gaman að vera á námskeiði og læra það sama og einhverjir „gamlir kallar”. Ég man að kennarinn hét Diðrik og það voru engar konur! Mér þótti það nóta bene ekki merkilegt þá held ég tólf ára drengnum! Það er kannski best að telja upp, svona einhverjar stórar dagsetningar í tæknisögu manns sjálfs. Skömmu seinna eða fyrir fermingarpengingana fór maður að eiga fyrir tölvu. Svona 2 árum seinna eða svo. Ég man að ég týmdi ekki að kaupa mér Sinclair Spectrum eins og allir í kringum mig. Ég fór bara til þeirra og við settum spólurnar í tækið og alveg eins og krakkarnir núna gátum við gleymt okkur fram eftir nóttu með litla Sinclair Spectrum, nokkrar kassettur með leikjum (munið þið eftir hljóðini sem kom úr þeim!) allt saman tengt í sjónvarpsskjá og ef maður var heppinn smá snakk og kók. Kókið var nú reyndar nauðsynlegt til að halda árverkni og vöku á þessum yfirsetum. En eins og ég segi ég týmdi ekki að kaupa mér Sinclair, mig langaði í „alvöru” tölvu. Pabbi þótti reyndar með framsýnni mönnum þarna í kringum áttatíu þegar hann keypti sér Makka, Macintosh II C og einhvern nálaprentara. Aðallega til þess að skrifa greinar fyrir Dagblaðið en hann skrifaði tónlistargagnrýni fyrir þá í mörg ár. Hann hamraði alltaf greinarnar inn og prentaði út á sérpappír frá DV með merkinu þeirra á. Ég man að mér þótti gaman að fá að fara með honum að skila greinunum. Eitt skiptið man ég að einhverjir voru að segja honum að hann ætti að fá sér eitthvað við tölvuna og þá þyrfti hann ekki að prenta greinarnar út og koma með þær. Heldur myndi tölvan hans hringja í tölvuna hjá DV og prenta síðan greinina út hjá þeim. Þetta fannst mér magnað. Þetta var svona um það bil árið 1983-4. En aftur að mínum tölvum. Ég held að ég hafi keypt mér gamlan IBM. Hálfgerða ferðavél, lyklaborðið smelltist yfir skjáinn, hann var pínulítill og það var hægt að fara með hana. Í þessu gat maður leikið sér í LOGO og einhverri annarri frumstæðri forritun. Ég man ekki hvað þessi vél hét, því miður, Ólöf þú hjálpar mér með nafnið ef þú lest þetta! :) Næst man ég eftir Ambra, bimmin dó nefnilega, þetta var notuð talva! Lélegar tölvur þessar Ambra í minningunni en flott söluherferð! Hún dugði í einhvern tíma fyrir ritgerðir og eitthvað slíkt í framhaldsskóla. Ég gaf bróður mínum hana einhvertíman í kringum 91 eða þar um bil. 92 byrjaði ég í háskólanum í bókmenntafræði og af því ég hafði tekið mér smá frí frá námi og verið að vinna gat ég keypt mér tölvu. Núna keypti ég mér Makka, netið var að byrja að koma upp í háskóla. Það var samt ennþá auðveldast fyrir mann að fara út í þjóðarbókhlöðu eða vera í tölvuverinu út í Árnagarði, til að tengjast. Þetta var bylting. Ég fékk mér póstfang og fór að senda póst til allra í útlöndum. Vina og fjölskyldu í USA frá því að ég hafði verið skiptinemi. Nota bene eftir að hafa skrifað út og fengið póstföng hjá þeim sem voru með þau. Síðast fékk ég mér Mitac fartölvu með ein 3 ár síðan. Á síðasta ári fékk ég mér nettan utanáliggjandi skrifara þegar ég var í Bandaríkjunum. Við gáfum eldri dótturinni DVD í tölvuna um jólin. Konan mín sem er í Margmiðlunarskólanum er með G4 Macintosh. En hún er líka með harðandisk sem hún getur komið með heim úr skólanum og sett í sér brackett í tölvuna hjá dótturinni og unnið í PC ef hún vill! Við vorum líka að kaupa í Góða hirðinum þar sem hún vinnur sem aðstoðarverslunarstjóri gamla tölvu fyrir 2500 kall (fín talva með 6 gíga hörðum disk 400 Mhz örgjörva og 128 í vinnsluminni og geisladrifi) þetta ætlum við fyrir yngri dótturinni eftir svona hálft ár þegar hún getur farið sjálf hugsanlega að gera eitthvað (í tölvum) það er mjög spennandi að fikta aðeins í öllum þessum tækjum að hennar mati. Tæknivædd? Nei við tengjumst ennþá netinu bara með módemi. Koma tímar og koma ráð og þá tengist maður á einhverjum öðrum hraða og með öðrum tækjum! Það er alveg pottþétt. Vona bara að þeir tímar séu skammt undan! Síðan vann ég lófatölvu á UT2001 Þannig að það er svo sem nóg til af tækjunum. Síðan keyptum við okkur stafræna myndavél í brúðkaupsferðinni til Írlands fyrir 2 ½ ári síðan og höfum við notað hana síðan. Skanninn eftir að við keyptum hann hefur líka verið notaður mikið sérstaklega vegna þess að það er hægt að skanna inn filmur og slides. Þannig að við höfum smátt og smátt verið að koma „gömlu” myndunum í stafrænt form. Ég hef ekki verið nógu duglegur að nýta mér það sem ég sá einn aðalkostinn við þetta að taka myndir á vélina og láta bara framkalla filmuna en ekki prenta út á pappír. Það kostar nefnilega bara brot af því sem maður er vanur að framkalla bara. Síðan getur maður bara sent myndirnar í tölvupósti á Hans Petersen og fengið þær framkallaðar. Þetta höfum við gert með jólakortin til dæmis síðustu ár. Við tökum fullt af myndum, þessi jól til dæmis 70-80 myndir og veljum þær úr sem eru bestar. Ef maður hefði farið með allar þessar myndir sem voru misvelheppnaðar í framköllun hefði kostnaðurinn hlaupið á tugum þúsunda. Þetta er nú svona eina verslunin sem maður stundar á vefnum. Þó svo að maður hafi keypt bækur og diska á Amason og pantað forrit fyrir skólann á netinu þá er ég ekki sá duglegasti í verslun á netinu. Ég fékk mér ekki gemsa fyrr en síðasta sumar, fannst ég ekki hafa nein not fyrr en einn slíkan fyrr en þá. Ég get ekki sagt að hann hafi bylt samskiptamáta mínum á neinn drastískann hátt. Ég neita því ekki að hann auðveldar manni þau. Ég tek það fram að ég er ekki með hann á lofti í Bónus að spyrja hvað gelatínið er eða lyftiduftið! Nú svo er þægilegt í hraðaprófunum að vera með skeiðklukkuna í gemsanum. Núna upp á síðkastið hefur hann fengið enn nýtt hlutverk þar sem að allar vekjaraklukkur heimilisins tóku upp á því að deyja og þá er nú svo sem þægilegt að hafa þann fítus í litla gemsanum og svo er þetta svo leiðilegt og frekt píp í honum að maður sprettur á fætur til að...setja á snooze :) Ég hef ekki verið með heimasíðu eða haldið úti vef persónulega sjálfur. Þó svo að ég hafi lengi kunnað það. Ég sýndi litla bróður mínum fyrstu heimasíðuna sem hann sá og hann var ekki lengi að fara fram úr mér í þekkinu á tölvum...og netinu. Setti á fót með félögum sínum vefsíðufyrirtæki, hið íslensk eimreiðarfélag. Síðan hef ég kynnt mér nokkur forrit og kennt á þau eins og frontpage og dreamweaver bæði nemendum og kennurum. En rétt eins og með gemsan hefur mér ég ekki fundist hafa þörf fyrir að halda úti síðu eða vef fyrr en núna. Ég hef samt notað eina ákveðna síðu sem er á innra netinu í skólanum og verið með verkefni þar fyrir nemendur sem hefur virkað eins og heimasíða þó hún sé ekki á netinu. Ég hef ekki lagt út í það að hafa persónulega undirsíðu undir heimasíðu skólans. Eiginlega vegna þess að síða skólans er hýst á kópavogsvefnum sem er svo sem fínt, kostar ekkert. En það líkt og póstföng kennara hefur ekki verið til friðs. Tölvumál kennara í Kópavogi versnuðu til muna eftir að sveitafélögin tóku yfir, við hættum að vera hjá Ísmennt og fórum undir Kópavogsbæ. Bara sem dæmi datt heimasíða skólans út tvisvar í síðustu viku og var niðri, ekkert hægt að uppfæra hana, í næstum þrjá daga þá vikuna og póstföngin er svipað ástatt með. Sem betur fer held ég ekki utan um heimasíðu skólans. Sagðist taka það að mér þegar við settum hana upp fyrir tveimur árum en ég sagði að það færi ákveðinn tími í að halda utan um hana svo vel væri og skólinn var ekki tilbúinn að leggja þann kostnað á sig.

Framtíðarsýnin er að tölvurnar verða sjálfsagðari hluti af daglegu lífi manns og meira en þær eru nú þegar. Ég þurfti virkilega að hugsa í hvað maður notar tölvuna. Þetta er orðið manni svo tamt. Maður tékkar á póstinum í vinnunni og netið (þegar það virkar :) Sama þegar heim kemur. Hjá manni sjálfum er kannski framtíðarsýnin eins konar óskalisti. Mig langar í betri tengingu en maður er með núna og síðan stafræna myndavél. Kannski má líka segja að framtíðasýnin sé sú að maður verði eins og afi gamli 94 ára gamall, fékk tölvu gefins fyrir 7-8 árum og situr við hana og skrifar ljóð og endurminningar. Afraksturinn af því var bók sem hann gaf út núna fyrir jólin. Set hérna mynd af afa við tölvuna. Myndir fjölskyldunni við tækin koma síðar.

2003-01-29T15:40:00.000Z

Humm, ég sé myndina hérna hjá mér en ekki á síðunni. Kíki á þetta. Hérna er allavega tenging í heimasíðuna mína. Heimasíða Gunnars. Þessi síða er að sjálfsögðu í vinnslu til 1. febrúar og verður tilbúin þá. Eftir það mun hún ekki breytast mikið! hehehehehe einmitt!

2003-01-29T15:35:00.000Z

Humm nú virðist myndin vera komin! Jæja hef á ekki meiri áhyggjur af því! En ég segi nú eins og Baldur hérna í hópnum. Þetta að vera kominn í vandræði, það er gott og gaman. Og aldrei leiðinlegt, kannski smá á meðan á því stendur en oftast nær þá fiktar maður sig áfram eða rambar óvart á lausnir eða sér nýja möguleika og lærir af þvi. Problem based learning í fullum gangi! Ég ætla að sjá hvort ég get ekki tengt á bloggið hans Baldurs hérna af því ég vitnaði í hann! Hérna er bloggið hans Baldurs. Ég ætla að senda þetta inn og setja svo tengingu í heimasíðuna mína. Pistillinn um tæknistöðu núna og hugmynd að vefleiðangri koma í kvöld eða á morgun. Það eru nokkrar ástæður fyrir því að þeir koma í kvöld eða á morgun. Núna fer litla sponsið að vakna og þá er ekki vinnufriður fyrri en eftir 9 í kvöld. Það er líka leikur á eftir við Pólverja. Íþróttafíkill? Já eflaust má segja það! En á móti þessu tvennu kemur að maður er veikur heima og hefur svo sem ekkert betra að gera! Eða hvað?

2003-01-29T00:05:00.000Z

Eitthvað er nú myndin að stríða mér að koma ekki þó ég hafi hent henni inn á heimasíðuna og náð í linkinn þar og peistað hann hérna. Athuga þetta betur á morgun. Enda ekki alveg í stuði til þess að finna út úr þessu. Alveg við það að fá hálsbólgu. Þá yrði ég sá síðasti á heimilinu. Allir aðrir búnir að fá hana og gott betur. Plús að það var foreldradagur hjá okkur í dag í skólanum og af því að ég er í sjálfsmatshópnum og tölvukennari þá hélt ég utan um. Það þýðir setti upp á tölvur, tók á móti og leiddi í gegnum könnun næstum 200 foreldra sem tóku þátt í foreldrakönnun hjá okkur í Snælandinu. Þessi foreldrakönnun var framkvæmd í Kanna tengist Skólarýni frá Bensa að norðan. Það eru eflaust einhverjir sem kannast við það. En allavega eins og ég segi...ég nenni ekki meiru í kvöld. Seiva þetta og kíki betur á þetta næst eins og ég segi við krakkana alltaf! :)

2003-01-28T23:46:00.000Z

Eins og ég sagði í gær þá ætlaði ég að koma með mynd sem sannaði það að þetta er spurning um líf og dauða. Myndin er tekin á meðan leikurinn við Þjóðverja stóð yfir og þarna var restin af fjölskyldunni farin annað að horfa á leikinn til þess að leyfa mér að njóta hans í botn. Eða til að fylgjast með mér njóta hans? Humm...það er nú það?

2003-01-27T20:12:00.000Z

Eitthvað hefur byrjunin verið brokkgeng hjá manni. Það er svo mikið að gera! Þetta er eins og Geir sagði í lýsingunni á leiknum við Þjóðverja: "Þetta er spurning um líf eða dauða. Ég ætla að setja mynd hérna inn á eftir...eða morgun, sem sannar það! En nú er boltinn byrjaður að rúlla og þetta ætti að fara að ganga hjá manni!

2003-01-18T13:26:00.000Z

Hér kemur tenging í heimasíðu Kennó þar er ég nemi í framhaldsdeild